سالانہ 60لاکھ افراد تمباکو نوشی کی بیماریوں سے لقمہ اجل بنتے ہیں

اسلام آباد (رپورٹ:حنیف خالد) ورلڈ ہیلتھ آرگنائزیشن کے مطابق دنیا بھر میں سالانہ کم و بیش 60لاکھ افراد تمباکو نوشی سے پیدا ہونے والی بیماریوں میں مبتلا ہو کر مر جاتے ہیں جن میں سے 6لاکھ سے زائد افراد خود تمباکو نوشی نہیں کرتے بلکہ تمباکو نوشوں کے ناک اور منہ سے نکلنے والے تمباکو کے دھویں کو اپنے سانس کے ساتھ پھیپھڑوں میں لے جانے کی وجہ سے کینسر‘ دمہ‘ کھانسی کے مرض میں مبتلا ہو جاتے ہیں۔کینسر کی علامات میں خشک کھانسی‘ بلغم میں خون‘ بخار‘ سانس میں تکلیف‘ تھکاوٹ‘ وزن میں کمی شامل ہے جو لوگ سگریٹ پیتے ہیں اُن میں پھیپھڑوں کے کینسر میں مبتلا ہونے یا پھیپھڑوں کے کینسر سے مرنے کے امکانات سگریٹ نہ پینے والوں کے مقابلے میں پندرہ سے بیس گنا زیادہ ہوتے ہیں۔ یہاں تک کہ دن میں چند سگریٹ پینا یا کبھی کبھار سگریٹ پینا پھیپھڑوں کے کینسر کا خطرہ بڑھاتا ہے۔ سگریٹ نوشی اور کینسر کی تحقیق کے مطابق تمباکو میں کئی ایسے کیمیکلز (CARCINOGENIC) کارسینو جینک ہوتے ہیں جو کینسر کا باعث بن سکتے ہیں۔ سگریٹ نوشی کی وجہ سے پھیپھڑوں‘ منہ اور گلے سمیت خوراک کی نالی‘ معدے اور مثانے کا کینسر بھی ہو سکتا ہے۔ سموکنگ اینڈ لنگ کینسر کے امراض کے ماہر ظفر اقبال خٹک کے مطابق نئی تحقیق سے یہ بات بھی سامنے آئی ہے کہ خون کا کینسر بھی ان مریضوں میں زیادہ ہے جو سگریٹ پیتے ہیں۔ ان میں سب سے زیادہ پھیپھڑوں کا کینسر ہے۔ پھیپھڑوں کا کینسر دنیا بھر میں سب سے زیادہ جان لیوا مرض ہے۔ ایک پرائیویٹ انٹرنیشنل ہسپتال کے ڈیٹا کے مطابق ہسپتال میں علاج کروانے والے افراد میں پھیپھڑوں کے کینسر (پرائمری لنگز کینسر) میں مبتلا افراد میں کل 419مریضوں پر تحقیق کی گئی‘ اُن میں سے 24اعشاریہ 6فیصد خواتین اور 75اعشاریہ 4فیصد مرد ہیں۔ پھیپھڑوں کے کینسر میں مبتلا مریضوں کی کچھ اہم علامتیں یاد رکھنا ضروری ہیں۔ پہلی علامت یہ ہے خشک کھانسی جو زیادہ تر دوائیوں سے ختم نہیں ہوتی‘ دوسرے بلغم میں خون آنا‘ تیسرے سینے میں درد یا بار بار انفیکشن جس کی وجہ سے بخار بھی ہو سکتا ہے۔ چوتھے سانس لینے میں تکلیف یا سانس کا دورانیہ بڑھ جانا‘ پانچویں بھوک کی کمی اور نامعلوم وجہ سے وزن میں کمی ہونا‘ چھٹی علامت میں تھکاوٹ اور کمزوری‘ ضروری نہیں کہ یہ سبھی علامت ہر کینسر کے مریض میں پائی جائیں‘ کچھ میں کم اور کچھ میں اس سے زیادہ بھی ہو سکتی ہیں۔ اس بات کو بھی ذہن میں رکھنا ہو گا کہ یہ علامات پھیپھڑوں کے کینسر کے علاوہ پھیپھڑوں کی ٹی بی وغیرہ میں بھی ہو سکتی ہیں۔ ایسی کوئی بھی علامات محسوس ہوں تو معالج سے رجوع کرنا چاہئے۔