گورنر کاکڑ سے پشتونخوا میپ کے رہنماؤں کی ملاقات، عوامی مسائل پر تبادلہ خیال

کوئٹہ ( پ ر ) پشتونخواملی عوامی پارٹی کے مرکزی جنرل سیکرٹری عبدالرحیم زیارتوال ، صوبائی صدر عبدالقہار خان ودان ، صوبائی ڈپٹی سیکرٹری سنیٹر سردار شفیق خان ترین نے پشتون بلوچ صوبے کے گورنر ملک عبدالولی کاکڑ سے ان کے دفتر میں ملاقات کی ۔ جس میں عوامی مسائل کی نوعیت سے متعلق مختلف امور پر تبادلہ خیال کیا گیا۔وفد نے گورنر کو بتایا کہ ضلع ہرنائی میں مسلسل دہشتگردی کے واقعات دراصل پشتون قومی اور ہرنائی کے معدنی وسائل پر قبضہ گری کیلئے راہ ہموار کرنا ہے ۔گزشتہ شب چپرلٹ میں رات 8سے 9بجے کے درمیان ایف سی چوکی اور لیویز چوکی کے عین نیچے دو سو گز کے فاصلے پر درجنوں ٹرک کے ٹائر اور انجن پر دہشتگرد ایک گھنٹہ فائرنگ کرتے رہے لیکن انتظامیہ خاموش تماشائی بنی رہی ۔ جس کے باعث لوگوں کا بہت بڑا نقصان ہوا ہے اور حکومت نے اس کی تلافی کرنی ہوگی ۔حکومت کی ذمہ داری ہے کہ وہ عوام، ٹرانسپورٹرز ، مائنز اونرز ، مزدوروں کو تحفظ فراہم کریں۔ اس موقع پر گورنر نے بتایا کہ تمام متعلقہ لوگوں سے ہرنائی کی مسلسل دہشتگردی کے واقعات پر بات کرونگا اور ٹرک اونرز کے نقصانات کے ازالے اور دہشتگردی کے واقعات کی روک تھام کے احکامات جاری کرونگا۔ اس کے علاوہ کام سیٹ یونیورسٹی اور بلوچستان یونیورسٹی کے پشتو ڈیپارٹمنٹ کے کریکلوم میں کمیٹی رپورٹ کے مطابق کام جاری رکھنے کی یقین دہانی کرائی ۔جس پر وفد نے گورنر صاحب کا شکریہ اداکیا۔