پرویز الٰہی دور میں بھی فرح گوگی والا کام دھڑلے سے کیا گیا، رانا ثناء

کراچی (ٹی وی رپورٹ) جیوکے پروگرام ”آپس کی بات“ میں میزبان منیب فاروق سے گفتگو کرتے ہوئے وفاقی وزیر داخلہ رانا ثناء اللہ نے کہا ہے کہ پرویز الٰہی نے بطور وزیراعلیٰ اپنے حالیہ دور میں بہت کرپشن کی ہے،ان کے دور میں بھی فرح گوگی والا کام بڑے دھڑلے سے کیا گیا، سابق رہنما پی ٹی آئی فردوس عاشق اعوان نے کہا کہ عمران خان نے پاکستان کے حالات نہ بدلے صرف اپنے گھر کے حالات بدلے، وزیراعظم کے معاون خصوصی بلال اظہر کیانی نے کہا کہ مہنگائی کنٹرول کرنے کیلئے ذخیرہ اندوزوں کیخلاف بھی کارروائی کررہے ہیں، آئی ایم ایف پروگرام ہونا پاکستان کی ترجیح ہے۔ وفاقی وزیر داخلہ رانا ثناء اللہ نے کہا ہے کہ پرویز الٰہی کا کیس محض تحریک انصاف سے علیحدگی کی پریس کانفرنس کرنے والا نہیں ہے، پرویز الٰہی نے بطور وزیراعلیٰ اپنے حالیہ دور میں بہت کرپشن کی ہے،ان کے دور میں بھی فرح گوگی والا کام بڑے دھڑلے سے کیا گیا، ٹھیکوں میں دس فیصد کمیشن لیا گیا، گرین لینڈ کو براؤن کروا کے اربوں روپے بے رحم طریقے سے کمائے۔ وفاقی وزیر داخلہ رانا ثناء اللہ نےکہا کہ پرویز الٰہی کاجو کیس ہے وہ پریس کانفرنس والا نہیں ہے کیوں کہ ان کے خلاف کرپشن کے جو الزامات ہیں وہ بہت بھاری ہیں ۔اس مرتبہ انہوں نے کوئی کسر نہیں چھوڑی اور ہر حد کو انہوں نے پار کیاحالانکہ ان کے پاس اللہ کا دیا بہت کچھ تھا۔اس مرتبہ محمد خان بھٹی جس کو پرنسپل سیکریٹری وزیراعلیٰ لگایااس مرتبہ انہوں نے فرح گوگی والاکام بڑے دھڑلے سے کیا۔پوسٹنگ ٹرانسفر کے پیسے، ٹھیکوں کے دس فیصد پہلے ایک ارب کا ٹھیکہ ہے تو دس کروڑ رکھ لو۔ اسی طرح گجرات میں بہت سی جگہوں پر اس کے بعد انہوں نے براؤن ایریا اور گرین ایریااس میں انہوں نے بہت پیسہ لیا۔ اس مرتبہ انہو ں نے اربوں روپیہ بڑے بے رحم طریقے سے کمایا ہے اس کے بعد اس کو جہاز میں رکھ کرمونس الٰہی باہر لے گئے۔