اسلام آباد ہائیکورٹ نے 144 ملین روپے قومی خزانے کے حوالے کردئیے

اسلام آباد (انصار عباسی) اگرچہ عام طور پر کفایت شعاری کی مہم غیر واضح ہے، اسلام آباد ہائی کورٹ نے اپنے رواں مالی سال کے بجٹ سے 144ملین روپے وزارت خزانہ کے حوالے کر دیے ہیں۔ اسلام آباد ہائی کورٹ کو رواں مالی سال کے لیے 1.1 ارب روپے کا بجٹ مختص کیا گیا۔ 30 مئی کو اسلام آباد ہائی کورٹ نے 144ملین روپے وزارت خزانہ کے حوالے کر دیئے۔ مذکورہ رقم کے حوالے کرنے کے بعد اسلام آباد ہائیکورٹ کا نظرثانی شدہ بجٹ 966 ملین روپے ہے۔ حال ہی میں چیف جسٹس اسلام آباد ہائی کورٹ نے نے متعلقہ حکام کو ہدایت کی کہ وہ بجٹ میں کٹوتی کریں اور عوامی مفاد میں اور قومی مقصد کے طور پر بچت کو قومی خزانے کے حوالے کردیں۔ چیف جسٹس اسلام آباد ہائی کورٹ نے یہ بھی حکم دیا کہ کسی بھی ملازم کو کوئی اعزازیہ نہیں دیا جائے گا۔ پچھلے سال بھی جون میں اسلام آباد ہائی کورٹ نے مالی سال 2021-22کے لیے مختص کل بجٹ کا 30 فیصد قومی خزانے کے حوالے کر دیا تھا۔ اس سال فروری میں وزیر اعظم شہباز شریف نے کفایت شعاری اقدامات کا اعلان کیا تھا جس میں تمام سرکاری اداروں کے بجٹ میں کٹوتیاں، کابینہ کے ارکان، ارکان پارلیمنٹ اور سرکاری ملازمین کی بعض مراعات اور سہولیات بشمول لگژری گاڑیاں اور سیکورٹی/ پروٹوکول شامل تھے۔ وزیراعظم نے چیف جسٹس آف پاکستان (سی جے پی) اور عدلیہ - جج (دونوں حاضر اور ریٹائرڈ)، عدالتی عہدیداران اور ملازمین- سے بھی اپیل کی تھی کہ وہ عدلیہ پر اخراجات کم کرکے قومی کفایت شعاری کی مہم میں اپنا حصہ ڈالیں۔ انہوں نے عدلیہ سے توقع ظاہر کی کہ وہ ریٹائرڈ ججوں کی زیادہ سے زیادہ پنشن کو 5 لاکھ روپے ماہانہ تک محدود کر دے گی اور اس کے علاوہ ججوں کی مراعات اور سہولیات کا بھی جائزہ لے گی۔ غیر جنگی دفاعی بجٹ میں کٹوتی کے حوالے سے وزارت خزانہ اور دفاع اپنی سفارشات کو حتمی شکل دینے کے لیے رابطے میں ہیں لیکن ابھی تک کوئی اعلان نہیں کیا گیا کہ دفاعی بجٹ میں کتنی کٹوتی کی گئی۔ اسی طرح سپریم کورٹ آف پاکستان اور ہائی کورٹس کی طرف سے اشارہ دیا گیا ہے ( اسلام آباد ہائی کورٹ ی کے استثناء کے علاوہ) انہوں نے قومی کفایت شعاری کی مہم میں حصہ ڈالنے کیلئے اپنے بجٹ سے کتنی بچت کی۔ دلچسپ بات یہ ہے کہ وزیر اعظم کے اعلان کردہ کفایت شعاری اقدامات کے نفاذ کے بارے میں دفتر وزیر اعظم یا وزارت خزانہ کی جانب سے اس نمائندے کے ساتھ کوئی اپ ڈیٹ شیئر نہیں کی گئی۔ وزیراعظم نے اپنی 85 رکنی کابینہ کا حجم کم کرکے 30نہیں کیا جیسا کہ قومی کفایت شعاری کمیٹی نے تجویز کیا تھا لیکن ان کی کابینہ کے ارکان نے سرکاری خزانے سے کوئی تنخواہ یا سہولت نہ لینے کا اعلان کیا تھا۔