ترقیاتی بجٹ 900 ارب روپے ہوگا

اسلام آباد (نیوزرپورٹر) وزیراعظم شہباز شریف نے ہدایت کی ہے کہ آئندہ بجٹ میں ترقیاتی منصوبوں کو شامل کرتے وقت صوبوں، متعلقہ شعبے کے اسٹیک ہولڈرز اور اتحادی جماعتوں کو مکمل اعتماد میں لیکر انکی تجاویز کو شامل کیا جائے، بجٹ میں زرعی شعبے، قابل تجدید توانائی، نوجوانوں کیلئے اعلی تعلیم، پیشہ ورانہ تربیت اور روزگار کے منصوبے ترقیاتی بجٹ کا اہم حصہ ہونگے۔ وزیراعظم آفس کے میڈیا ونگ سے جاری بیان کے مطابق یہ ہدایات وزیراعظم نے اپنی زیر صدارت پبلک سیکٹر ڈویلپمنٹ پروگرام کے حوالے سے بجٹ تجاویز پر منعقدہ اعلی سطحی اجلاس میں دیں۔ اجلاس میں وفاقی وزراء اسحاق ڈار، خواجہ آصف، احسن اقبال، رانا ثناء اللہ، رانا تنویر حسین، مشیر وزیرِ اعظم احد خان چیمہ، معاونین خصوصی ملک احمد خان، عطاء اللہ تارڑ، جہانزیب خان اور متعلقہ اعلی حکام نے شرکت کی۔ وزیراعظم نے ہدایت کی کہ آئندہ بجٹ میں پی ایس ڈی پی کے تحت نوجوانوں کی ترقی کیلئے خصوصی طور پر رقم مختص کی جائے۔ آئندہ بجٹ میں نوجوانوں کو اعلی تعلیم، پیشہ ورانہ تربیت اور باوقار روزگار کے مواقع فراہم کرنے کیلئے اقدامات شامل کئے جائیں۔ نوجوانوں کی اعلی تعلیم کیلئے پاکستان اینڈؤمنٹ فنڈ قائم کیا جائے۔ وزیر اعظم نےہدایت کی کہ بجٹ میں آئی ٹی کے فروغ کیلئے منصوبے شامل کئے جائیں۔کسان پیکیج کے تحت شروع کئے گئے منصوبے جاری رکھے جائیں۔ بجٹ میں قابل تجدید توانائی کے منصوبے شامل کئے جائیں۔ پن بجلی کے منصوبوں اور توانائی کے شعبے کی جدت کیلئے بجٹ میں خصوصی رقوم مختص کی جائے۔ اجلاس کو پی ایس ڈی پی کے تحت جاری منصوبوں پر پیش رفت اور آئندہ مالی سال کیلئے منصوبوں کے حوالے سے تجاویز کے بارے تفصیلی طور پر آگاہ کیا گیا۔اجلاس کو مزید بتایا گیا کہ آئی ٹی شعبے کی ترقی اور برآمدات میں اضافے کیلئے بھی منصوبے بجٹ کا حصہ ہونگے۔