PTIکی گرفتار خواتین نے جیل میں تشدد اور زیادتی کی تردید کر دی

لاہور(خصوصی رپورٹر) پاکستان تحریک انصاف کی گرفتار خواتین رہنمائوں نے جیل میں تشدد کی تردید کرتے ہوئے واضح کیا ہے کہ ہمارے ساتھ جیل میں کوئی زیادتی نہیں ہوئی،لیکن ہمیں جیل میں رکھنا زیادتی تھی،جب ہم نے کچھ کیا ہی نہیں تو رکھنا ہی نہیں چاہیے تھا۔ذرائع کے مطابق9مئی کو جنائوح ہائوس پر حملہ اور جلائو گھیرائو کے بعد حراست میں لی جانے والی پاکستان تحریکِ انصاف کی خواتین کارکنان اور رہنما ئوں کو انسدادِ دہشت گردی کی عدالت میں پیش کر دیا گیا ۔تھانہ سرور روڑ پولیس نے تحریکِ انصاف سے وابستہ خواتین ملزمان کو گذشتہ روز شناخت پریڈ مکمل ہونے پر عدالت پیش کیا۔خواتین ملزمان میں صنم جاوید، طیبہ راجہ، عالیہ حمزہ سمیت سات دیگر شامل تھیں ۔اس موقع پر میڈیا سے بات کرتے ہوئے جیل میں تشدد کے حوالے سے کیے گئے سوال کےجواب میں صنم جاوید کا کہنا تھا کہ جیل میں ہمارے ساتھ کوئی زیادتی نہیں ہوئی، ہمیں جیل میں رکھنا ہی زیادتی تھی کیونکہ ہم نے کچھ کیا ہی نہیں تو جیل میںرکھنا ہی نہیں چاہیے تھا۔اس موقع پرپی ٹی آئی رہنما عالیہ حمزہ کا کہنا تھا کہ آدھی رات کو عورتوں کو گھروں سے گھسیٹ کر لا کر آپ عورتوں کی اور کیا تذلیل کریں گے۔پی ٹی آئی رہنما طیبہ راجا کا کہنا تھا کہ اگر سوشل اکائونٹس سے مسئلہ ہے تو سوشل میڈیا کے مقدمے کریں اس طرح سیاسی انتقام کا نشانہ بنانا ضروری تو نہیں ہے۔