پولیس گھروں کی دیواریں پھلانگ کر لوگوں کو بلاوجہ تنگ نہ کرے، اسلام آباد ہائیکورٹ

اسلام آباد (صباح نیوز) اسلام آباد ہائی کورٹ نے پولیس کو ہدایت کی ہے کہ دیواریں پھلانگ کر لوگوں کو بلاوجہ تنگ نہ کیا جائے۔ہائی کورٹ میں عمر ایوب خان کے گھر چھاپہ اور فیملی کو ہراساں کرنے کے خلاف اہلیہ کی درخواست پر سماعت ہوئی۔وکیل نے عدالت کو بتایا کہ عمر ایوب کے کم عمر بیٹے کو دھمکیاں دی جا رہی ہیں ، اسے ہراساں کرنے سے روکا جائے۔عدالت نے پولیس کو ہدایت کی کہ جو ایف آئی آر میں نامزد ہے اسے بے شک گرفتار کریں یوں کسی اور کو ہراساں نہ کیا جائے، ایسے دیواریں پھلانگ کر لوگوں کو بلاوجہ تنگ نہ کریں۔ایس ایس پی آپریشنز نے یقین دہانی کرائی کہ عدالتی حکم کی تعمیل ہو گی۔اسٹیٹ کونسل نے بتایا کہ درخواست گزار کے خلاف10 مئی کو ایف آئی آر درج ہوئی ، جس کی کاپی منسلک ہے، تمام قانونی کارروائی پوری کی گئی، چھاپہ مارنے سے قبل سرچ وارنٹ بھی موجود تھے۔عدالت نے متعلقہ دستاویزات درخواست گزار کو فراہم کرنے کی ہدایت کرتے ہوئے سماعت اگلے ہفتے تک ملتوی کردی۔