پبلک اکائونٹس کمیٹی نے ندیم افضل چن کے والد کی گرفتاری کا نوٹس لے لیا

اسلام آباد (صباح نیوز)پبلک اکائونٹس کمیٹی نے پیپلز پارٹی کے رہنما ندیم افضل چن کے والد کی گرفتاری کا نوٹس لے لیا۔پی اے سی کے چیئرمین نور عالم خان کی زیر صدارت اجلاس ہوا۔پبلک اکائونٹس کمیٹی نے افضل چن کی گرفتاری کو قانون اور انسانی حقوق کی خلاف ورزی قرار دیتے ہوئے وفاقی سیکرٹری داخلہ، چیف سیکرٹری اور آئی جی پنجاب سے 3 دن میں رپورٹ طلب کر لی۔چیئرمین پی اے سی نے کہا کہ افضل چن کو رات 12 بجے بلاوجہ گرفتار کیا گیا، 85 سال کے افضل چن 9 مئی کے واقعہ میں ملوث نہیں۔نور عالم خان نے کہا کہ افضل چن سیاست یا ریاست مخالف سرگرمیوں میں بھی ملوث نہیں، ندیم افضل چن کے والد چل پھر بھی نہیں سکتے، ان کو ہراساں کیا گیا۔انہوں نے کہا کہ افضل چن کو گرفتار کر کے ان کی بے عزتی کی گئی۔پی اے سی نے خیبر پختونخوا پولیس کی کارکردگی پر بھی سوال اٹھا دیئے۔نور عالم خان نے کہا کہ کے پی کے پولیس ملزمان کے خلاف کچھ نہیں کر رہی، ریڈیو پاکستان اور پشاور قلعہ پر حملہ کرنے والوں کو پکڑا جائے۔