دیامر بھاشا ڈیم کیلئے دریائے سندھ کا رُخ نومبر میں موڑ دیا جائے گا

اسلام آباد (خصوصی نمائندہ) زیر تعمیر دیامر بھاشا ڈیم کے لئے دریائے سندھ کا رُخ اسی سال نومبر میں موڑ دیا جائے گا۔ رُخ موڑے جانے کے بعد دریائے سندھ مذکورہ مقصد کے لئے تعمیر کی گئی تقریباً ایک کلو میٹر طویل ڈائی ورشن ٹنل اور 0.8 کلو میٹر طویل ڈائی ورشن کینال سے گزرنے کے بعد مین ڈیم سائٹ سے زیریں جانب دوبارہ اپنے قدرتی راستہ سے جاملے گا۔ دریا کا رُخ موڑنا دیامر بھاشا ڈیم کی تعمیر کے لئے اہم ترین اہداف میں سے ایک ہے۔ چیئرمین واپڈا انجینئر لیفٹیننٹ جنرل (ر) سجاد غنی کو یہ بات ان کے دیا مر بھاشا ڈیم کے دورے پر ریور ڈائی ورشن سسٹم پر پیش رفت بارے ایک بریفنگ کے دوران بتائی گئی۔ چیئرمین واپڈا کو بتایا گیا کہ منصوبے کی 13 سائٹس پر تعمیراتی کام جاری ہے۔ پہلے مرحلے کی ڈائی ورشن کے لئے مین ڈیم سے بالائی جانب عارضی (Starter)ڈیم مکمل کیا جاچکا ہے جبکہ زیریں جانب عارضی (Starter)ڈیم پر کام جاری ہے اور یہ نومبر تک مکمل ہوجائے گا۔ چیئرمین کو ڈائی ورشن کینال پر بھی پیش رفت بارے بتایا گیا۔ ڈائی ورشن کینال ہائی فلو سیزن میں دریا کے بہائو کے لئے استعمال ہوگی۔ بریفنگ کے دوران منصوبے پر مجموعی پیش رفت اور اہداف بارے بھی گفتگو کی گئی۔ چیئرمین واپڈا نے منصوبے کی مختلف سائٹس پر تعمیراتی کام کا جائزہ لیا اور پراجیکٹ سائٹ پر حال ہی میں مکمل ہونے والے فیلڈ ہسپتال کا افتتاح بھی کیا۔