برطانیہ نے یمن میں پاکستان نژادخاتون سفیر تعینات کر دی

لندن(این این آئی)برطانیہ نے پاکستان نژاد خاتون عبدہ شریف اوبی کو یمن میں برطانیہ کی نئی سفیر تعینات کر دیا ہے ۔ رپورٹ کے مطابق برطانیہ نے پاکستان نژاد قانونی وکیل عبدہ شریف اوبی کی یمن میں برطانیہ کے نئے سفیر کے طور پر تقرری کا اعلان کیا ہے ،ستمبر میں اپنا عہدہ سنبھالیں گی،اس سے قبل وہ کئی عہدوں پر کام کر چکی ہیں ۔ عبدہ شریف لندن میں ایک پاکستانی مسلم تارک وطن گھرانے میں پیدا ہوئیں،۔ انہوں نے 2001 میں ایک پرائیویٹ آفس میں وکیل کے طور پر اپنے کیریئر کا آغاز کیا۔ 2003 میں انہوں نے برطانوی دفتر خارجہ میں بطور قانونی ڈائریکٹر جوائن کیا، 2006 میں انہیں بغداد میں برطانوی سفارت خانے میں قانونی مشیر اور محکمہ انصاف اور انسانی حقوق کی سربراہ کے طور پر تعینات کیا گیا،2009 سے 2011 تک وہ کونسل آف یورپ میں یو کے مشن کی نائب سفیر رہیں۔ 2011 میں وہ بن غازی لیبیا میں یو کے آفس کی سربراہ مقرر ہوئیں۔2012 میں وہ بیروت میں نائب برطانوی سفیر کے عہدے پر تعینات ہوئیں اور 2016 میں برطانوی دفتر خارجہ میں قانون کی حکمرانی کیلئے حکمت عملی کے شعبے کی ڈپٹی ڈائریکٹر کے طور پر لندن واپس آئیں ایک سال بعد کیبنٹ آفس کی ڈپٹی ڈائریکٹر مقرر ہوئیں،2019 سے 2022 تک وہ برٹش فارن آفس کے مشرق وسطی اور شمالی افریقہ کے ڈائریکٹوریٹ کے عراق اور جزیرہ نما عرب کی سربراہ کے طور پر کام کرتی رہیں ۔