12 کروڑ سے زائد کی مبینہ کرپشن انکوائری،مونس الٰہی کیخلاف مقدمہ درج

لاہور(صباح نیوز) بارہ کروڑ دس لاکھ روپے کی مبینہ کرپشن کی انکوائری کے معاملے میں ایف آئی اے منی لانڈرنگ سرکل نے سابق وزیراعلیٰ پنجاب پرویزالہٰی کے بیٹے مونس الہٰی کے خلاف مقدمہ درج کرلیا ۔ایف آئی اے کے مطابق مونس الہٰی بطور ایم این اے کروڑوں روپے کی کرپشن میں ملوث رہے ۔ عامر سہیل مبینہ طور پر مونس الہٰی کے کیش رائیڈر اورفرنٹ مین کے طور پر کام کرتا رہا۔مونس الہٰی کو تین کال اپ نوٹس جاری کئے گئے مگر وہ ایک بار بھی پیش نہیں ہوئے۔ مقدمہ میں زہرہ الہٰی اورعامر سہیل کو بھی نامزد ملزم قرار دیا گیا ہے۔اس سے قبل لاہورکی مقامی عدالت نے اینٹی کرپشن کی جسمانی ریمانڈکی استدعامسترد کرتے ہوئے تحریک انصاف کے صدر اور سابق وزیر اعلیٰ پنجاب چوہدری پرویز الٰہی کو جوڈیشل ریمانڈپرجیل بھیجنے کا حکم دیا۔