روس سے تیل سستا آرہا ہے قیمتوں میں کمی ہوگی ،وزیر پٹرولیم

کراچی (ٹی وی رپورٹ) وزیرمملکت برائے پٹرولیم مصدق ملک نے کہا ہے کہ نو مئی کے ذمہ داروں کیخلاف کوئی ماورائے آئین و قانون کام نہیں کیا جائے گا، ہیومن رائٹس کہاں گھروں میں آگ لگانے کی اجازت دیتے ہیں، بجٹ میں کسان اور غریب آدمی کو تحفظ دیا جائے گا ،امیروں اور سرمایہ کاروں کیلئے بجٹ میں چھوٹ نہیں ہوگی، روس سے تیل سستا آرہا ہے قیمتوں میں کمی ہوگی، ترکمانستان کے ساتھ تاپی گیس پائپ لائن معاہدہ حتمی مراحل میں ہے، بجلی چوری روکنے کیلئے ہر ٹرانسفارمر پر الیکٹرانک میٹر لگانے کی تجویز ہے۔وہ جیو کے پروگرام ”کیپٹل ٹاک“ میں میزبان حامد میر سے گفتگو کررہے تھے۔ پروگرام میں صدر لاہور چیمبر آف کامرس کاشف انور اور صدر کراچی چیمبر آف کامرس طارق یوسف بھی شریک تھے۔ طارق یوسف نے کہا کہ رات آٹھ بجے دکانیں بند کرنے کے حکم پر عملدرآمد کریں گے، سردیوں اور گرمیوں میں آٹھ بجے کا مطلب مختلف ہوتا ہے، آج آٹھ بجے مغرب ہورہی ہے چار مہینے بعد آٹھ بجے عشاء ہورہی ہوگی، صنعتی ترقی کیلئے انرجی کی لاگت انتہائی اہم ہے۔کاشف انورنے کہا کہ آٹھ بجے دکانیں بند کرنے کے فیصلے پر عید کے بعد عملدرآمد ہونا چاہئے، توانائی کی بچت کیلئے صرف رات آٹھ بجے دکانیں بند کرنا ہی آپشن نہیں ہے، موسم گرما اور موسم سرما کے اوقات کار میں فرق ہونا چاہئے۔پروگرام میں اسلام آباد کی مارکیٹ تنظیموں کے عہدیداروں سے گفتگو کے کلپس بھی شامل کیے گئے۔ صدر آل پاکستان انجمن تاجران اجمل بلوچ نے کہا کہ ہم نے آٹھ بجے دکانیں بند کرنے کا فیصلہ مسترد کردیا ہے، آٹھ بجے کیسے دکانیں بند کردیں اس وقت تو لوگ خریداری کیلئے آتے ہیں، تاجر سب سے مہنگی بجلی خریدتے ہیں ہمیں بجلی دی جائے۔صدر جی نائن مارکیٹ اسلام آباد راجہ جاوید اقبال نے کہا کہ آٹھ بجے دکانیں بند کرنے کا فیصلے ہمیں منظور نہیں ہے، حکومت تاجرو ں سے متعلق فیصلہ کرنے سے قبل ہم سے تو مشاورت کرے۔