بجٹ میں ریلوے ڈویژن کیلئے30ارب روپے مختص کردئیے گئے

ملتان(سٹاف رپورٹر)وفاقی حکومت نے آئندہ مالی سال 24۔2023 کے بجٹ میں سرکاری شعبہ کے ترقیاتی پروگرام کے تحت ریلوے ڈویژن کے 28 جاری اور 9 نئے منصوبوں اور سکیموں کیلئے مجموعی طور پر30ارب روپے مختص کئے ہیں۔ جمعہ کو جاری پی ایس ڈی پی دستاویز کے مطابق 28 جاری منصوبوں کیلئے مجموعی طور پر28ارب85کروڑ روپے مختص کئے گئے ہیں جبکہ 9 نئی سکیموں کیلئے صرف 4ارب15کروڑ روپے رکھے گئےہیں۔ ریلوے ڈویژن کے نئے منصوبوں میں ٹریک مشینوں کی تبدیلی کیلئے 40کروڑروپے، پاکستان ریلوےکی موجودہ مین لائن ایم ایل ون کی اپ گریڈیشن اور حویلیاں کے قریب ڈرائی پورٹ کے قیام کے سی پیک کے منصوبے کیلئے 20کروڑ روپے، ویکیوم بریک سے ایئر بریک پر 328 ایم بی ایف آر ایس کی تبدیلی پر 40کروڑ روپے، ریلوے ملتان ڈویژن کےشیرشاہ ریلوے پل نمبر ون اور شیرشاہ کندیاں پر بند کی تعمیر کیلئے15کروڑ روپے، ٹنڈو آدم روہڑی سیکشن سکھر ڈویژن پر ٹریک سیفٹی ورکس کی فوری تنصیب کیلئے ایک ارب روپے، سکھر ڈویژن میں روہڑی خان پور سیکشن پر ٹریک سیفٹی ورکس کی فراہمی کیلئے ایک ارب روپے، مواصلاتی نظام کی بہتری کیلئے20کروڑ روپے، کراچی لوڈ آئوٹ سٹیشن ٹرمینل پر پورٹ قاسم ریل مال برداری ٹرمینل کے قیام کے منصوبے کیلئے 30کروڑ روپے، ریلوے ٹریک کی بحالی کی مشینوں اور کرینوں کی بحالی و مرمت کیلئے50کروڑروپے مختص کئے گئے ہیں۔بجٹ تفصیلات کے مطابق 28 جاری منصوبوں میں وزارت ریلوے کے چائنہ پاکستان اقتصادی راہداری سپورٹ پراجیکٹ نظرثانی شدہ جاری منصوبہ کیلئے 6کروڑ روپے، چمن یارڈ بشمول پاک افغان بارڈر ریلوے ٹریک کی تعمیر کیلئے 59کروڑ20لاکھ روپے، کراچی اور بھکر میں ٹریک سیفٹی ورکس کی تعمیر کیلئے 86 کروڑ 88 لاکھ91ہزار روپے، کراچی مارشلنگ یارڈ پوائنٹ کی اپ گریڈیشن اور ٹرمینل سہولت کی فراہمی کیلئے 94 کروڑ30لاکھ روپے، بھرپور گنجائش کی حامل 800 مال بردار بوگیوںاور 200 مسافر کوچوں کی تیاری اور خریداری کیلئے 17ارب 63کروڑ 91 لاکھ 32ہزار روپے مختص کیے گئے ہیں۔ ریلوے ڈویژن کے دیگر جاری منصوبوں میں 5 ڈیزل الیکٹرک انجنوں کی بحالی و مرمت کیلئے 50کروڑ روپے، 300 کے وی اے کے ڈی جی سیٹس کی بحالی کیلئے 57کروڑ41لاکھ 60ہزارروپے، کے پی ٹی کی بحالی اور کراچی ریل رابطے کی بحالی (نظرثانی شدہ) کیلئے69کروڑ 34لاکھ32ہزار روپے، لودھراں، ملتان، خانیوال، شاہدرہ باغ ایم ایل ون سیکشن کے پرانے سگنل سسٹم کی تبدیلی کیلئے ایک ارب27کروڑ76لاکھ 70ہزار روپے، 100 ڈیزل انجنوں کی خصوصی مرمت اور موجودہ انجنوں پر انحصار کے منصوبے کیلئے 2ارب روپے، 600 مسافر کوچوں اور 1200 بوگیوں کی خصوصی مرمت کیلئے76کروڑ90لاکھ روپے اور کوٹری جامشورو ریلوے لنک کی بحالی و مرمت اور کوٹری اخوند آباد کے کوٹری دادو سیکشن کی مرمت و بحالی کیلئے89کروڑ36لاکھ6ہزار روپے مختص کئے گئے ۔