اسٹیبلشمنٹ ڈویژن کی جاری اور نئی تر قیاتی سکیموں کیلئے 840ملین روپے مختص

اسلام آ باد ( نیوز رپورٹر)پی ایس ڈی پی کے تحت اسٹیبلشمنٹ ڈویژن کی جاری اور نئی تر قیاتی سکیموں کیلئے 840ملین روپے مختص کئے گئے ہیں۔۔ان میں فیڈرل پبلک سروس کمیشن کی جانب سے امتحانات کے انعقاد کیلئے کمپیوٹر بیسڈ ٹیسٹنگ ،سول سروسز اکیڈمی والٹن لاہور میں بولان ہاسٹل کے دوسرے فلور کی تعمیر ،سارک بلڈنگ اسلام آباد میں نیشنل انسٹی ٹیوٹ آف مینجمنٹ کا قیام ، این ایس پی پی لاہور کے ادارہ جاتی استحکام اور ٹریننگ و ریسر چ فنکشنز کا فروغ اور سول سروسز اکیڈمی لاہور میں پاکستان ایڈمنسٹریٹو سروس آفیسرز کی تربیتی سرگرمیوں کے فروغ کی سکیمیں شامل ہیں جن کیلئے بالترتیب 35.64 ملین روپے، 8 ملین روپے، 59.8 ملین روپے، 403.48 ملین روپے، 112.43 ملین روپےمختص کئے گئے ہیں۔اسٹیبلشمنٹ ڈویژن کی نئی سکیموں میں نیشنل انسٹی ٹیوٹ آف مینجمنٹ میں اکیڈمک بلاکس کی اپ گریڈیشن اور سکیورٹی اقدامات ، این سی آر ڈی کمپلیکس (فیز ۔3) چک شہزاد اسلام آباد کی اپ گریڈیشن اور نیشنل انسٹی ٹیوٹ آف مینجمنٹ پشاور میں آڈیٹوریم کی تعمیر شامل ہےجن کیلئے بالترتیب 64.6 ملین روپے، 35.99 ملین روپے اور 120 ملین روپے مختص کرنے کی تجویز دی گئی ہے۔ ان نئی سکیموں کی مجموعی لاگت کا تخمینہ 309.72 ملین روپے لگایا گیا ہے۔