بھارتی فوج نے رواں سال اب تک ڈھائی ہزار کشمیریوں کو گرفتارکیا

سرینگر (اے پی پی)مقبوضہ کشمیر میں بھارتی فوجیوں، پیراملٹری فورسز ، پولیس اور بدنام زمانہ تحقیقاتی اداروں نے رواں سال اب تک مقبوضہ علاقے میں کل جماعتی حریت کانفرنس کے رہنمائوں اور متعدد خواتین سمیت ڈھائی ہزارسے زائد کشمیریوں کو گرفتار کرلیا ۔ اعداد و شمار کے مطابق بھارتی فوجیوں، پیراملٹری فورسز اور پولیس کے علاوہ بدنام زمانہ تحقیقاتی ادارے این آئی اے اور ریاستی تحقیقاتی ادارے ایس آئی اے کے اہلکاروں نے رواں سال اب تک مقبوضہ علاقے میں محاصرے اور تلاشی کی کارروائیوں اور گھروں پر چھاپوں کے دوران 2500سے زائد کشمیریوں کو گرفتار کرلیا۔ گرفتار ہونے والوں میں کل جماعتی حریت کانفرنس کے رہنما بلال صدیقی، زمرودہ حبیب، یاسمین راجہ اور صحافی عرفان معراج شامل ہیں۔