بجٹ تجزیہ جعلی،اقتصادی سروے کیساتھ ڈارکومستعفی ہوناچاہئے تھا،PTI

اسلام آباد (نمائندہ جنگ) تحریک انصاف کے رہنمائوں نے کہاہے کہ بجٹ کا تجزبہ مکمل طور پر جعلی اور من گھڑت ہے ، موجودہ حکومت کی ایک سالہ کارکردگی میں ملک کئی دہائیاں پیچھے چلا گیا ، اقتصادی سروے پیش کرنے کے ساتھ ہی وزیر خزانہ اسحاق ڈار کو استعفیٰ بھی دینا چاہئے تھا۔ تحریک انصاف کے مرکزی سیکرٹری جنرل عمر ایوب نے کہا ہےکہ بجٹ کا تجزبہ مکمل طور پر جعلی اور من گھڑت بجٹ پر مبنی ہے ، یہ تجزبہ بوگس اور جھوٹے اعداد و شمار کی بنیاد پر پیش کیا گیا ، اس تجزئیے میں کوئی حقیقت پسندی یا درستگی نہیں۔ عوام کو مزید مایوسی اور درد کے سوا کچھ نہیں ملنے والا۔ امپورٹڈ حکمران خوش ہیں کیونکہ ان کی دولت باہر ہے۔ پاکستان کو مزید نقصان ہونے جا رہا ہے۔ تحریک انصاف وسطی پنجاب کے جنرل سیکرٹری حماد اظہر نے کہا کہ بنتا تو یہ تھا کہ ڈر صاحب اس مالی سال کا اقتصادی سروے پیش کرنے کے ساتھ اپنا استعفیٰ بھی پیش کرتے ۔ جو معاشی تباہی ایک سال میں پی ڈی ایم نے برپا کی ہے وہ کسی جنگ یا وبا میں بھی نہ ہوئی۔ادھر پی ٹی آئی مغربی پنجاب کے صدر فرخ حبیب نے اپنے ردعمل میں کہا کہ قومی اقتصادی سروے میں صنعت ، ترسیلات زر ، برآمدات ، مجموعی ترقی کے ہدف ، فی کس آمدن ، زراعت اور خدمات ، سرمایہ کاری سمیت دیگر اہم شعبے منفی میں رہے۔ نالائق اعظم شہباز شریف حکومت کی ایک سالہ کارکردگی میں ملک کئی دہائیاں پیچھے چلا گیا ہے۔