پاکستانی ڈاکٹروں کی تنظیم’ اپنا‘کاترکیہ زلزلہ متاثرین کیلئے3لاکھ 50 ہزار ڈالر کا عطیہ

واشنگٹن (این این آئی) ترکی میں تباہ کن زلزلے سے متاثرہ بھائیوں کے ساتھ اظہار یکجہتی کرتے ہوئے پاکستانی نڑاد شمالی امریکہ کے معالجین کی ایسوسی ایشن (ایسوسی ایشن آف فزیشنز آف پاکستانی ڈیسنٹ آف نارتھ امریکہ) نے زلزلہ متاثرین کی بحالی اوران کے لئے مکانات کی تعمیر کیلئے3لاکھ50ہزارڈالر کا عطیہ دیا ہے۔ امریکہ میں پاکستان کے سفیر مسعود خان کے ہمراہ ایسوسی ایشن آف فزیشنز آف پاکستان ڈیسنٹ آف نارتھ امریکہ کے وفد نے واشنگٹن ڈی سی میں ترکی کے سفارت خانے کا دورہ کیا اور ʼʼاپناʼʼکی جانب سے دیئے گئے عطیہ کا چیک ترک سفیر کو پیش کیا۔ صدرʼʼاپناʼʼڈاکٹر ارشد ریحان کی سربراہی میں وفد میں ڈاکٹر رشید پراچہ، ڈاکٹر عتیق صمدانی، ڈاکٹر طیب رانا، ڈاکٹر راشد حنیف، اور ڈاکٹر عرفان سلیمان شامل تھے۔ ڈاکٹر طیب رانا، خزانچی "اپنا" نے چیک ترک سفیر کو پیش کیا۔ ترکیہ کے سفیر حسن مرجان نے سفیر پاکستان مسعود خان اور ایسوسی ایشن آف فزیشنز آف پاکستان ڈیسنٹ آف نارتھ امریکہ کی قیادت کا شکریہ ادا کرتے ہوئے کہا کہ ان کے جذبات اور عطیات سے ان کی ترکی اور اس کے عوام کے ساتھ وابستگی کی واضح عکاسی ہوتی ہے۔