اداروں کیخلاف سازشیں کرنیوالے آج مہنگائی پر لیکچر دے رہے ہیں، حامد حمید

سرگودھا(این این آئی)وزیراعظم کے معاون خصوصی و وفاقی پارلیمانی سیکرٹری چوہدری حامد حمید نے کہا کہ حکومت نے گھی کی قیمتوں میں کمی کر دی اور یوٹیلٹی سٹورز پر بازار سے کم نرخوں آٹا،چینی اور گھی دستیاب ہو گا۔جس کے لئے سستا گھی سکیم لا کر 1700 ارب روپے کی سبسڈی دی جا رہی ہے جس سے غریب عوام کو خاطر خواہ ریلیف حاصل ہوگا۔ وزیراعظم کے معاون خصوصی و وفاقی پارلیمانی سیکرٹری چوہدری حامد حمید نے کارکنان کے اجتماع میں خطاب کرتے ہوئے کہا کہ عوام اور اداروں کے خلاف سازشیں کرنیوالے آج مہنگائی پر لیکچر دے رہے ہیں عمران خان اپنے دور میں کہتے تھے ٹماٹر اور آلو کی قیمتیں دیکھنے نہیں آیا آج وہی لوگ آلو اور ٹماٹر کی قیمتوں پر سیاست کرنا چاہتے ہیں۔انہوں نے کہا کہ پاکستان مسلم لیگ ن نے ہمیشہ عوامی فلاح و بہبود کے منصوبوں کو بڑھاوا دیا ہے اور آئندہ بھی پاکستان کے عوام کیلئے جو کچھ ہوسکا کرینگے۔