اتحادیوں میں اختلافات، گورنر KP کو ہٹانے کا مطالبہ

14 جون ، 2023

کراچی(ٹی وی رپورٹ)عوامی نیشنل پارٹی (اے این پی) کے بعد مسلم لیگ ن اور پیپلز پارٹی کے صوبائی قائدین نے بھی گورنر خیبر پختونخوا حاجی غلام علی کو عہدے سے ہٹانے کا مطالبہ کردیا۔ حکومتی اتحادی جماعتوں کی صوبائی قیادت گورنر خاجی غلام علی کے کردار سے ناراض ہے۔ پیپلز پارٹی اور مسلم لیگ ن کے مقامی رہنماؤں نے پارٹی قیادت سے گورنر کو ہٹانے کا مطالبہ کیا ہے۔ مسلم لیگ ن کے صوبائی رہنما اختیار ولی نے کنونشن سے خطاب میں کہاکہ صوبے میں گورنر راج قائم ہے، مسلم لیگ کے کارکنان صوبے میں 3 دہائیوں سے اپوزیشن میں ہیں۔انہوں نے قیادت سے مطالبہ کیا کہ گورنر کو ہٹا کر ن لیگ کارکنان کے ہاتھ کھول دیئے جائیں، اتحادی گورنر اقتدار کے مزے لوٹ رہے ہیں اور ہمارے کارکن منہ دیکھ رہے ہیں، گورنر لیگی کارکنان پر بھی راج کر رہے ہیں۔ پیپلز پارٹی کی سابق رکن پختونخوا اسمبلی نگہت اورکزئی نے بلاول بھٹو اور آصف علی زرداری سے مطالبہ کیا کہ گورنر غلام علی کو عہدے سے ہٹایا جائے، صوبے میں گورنر راج نہیں مانتے، جیالوں پر گورنر ہاؤس کے دروازے بند کئے گئے ہیں۔ صدر اے این پی خیبر پختون خوا ایمل ولی نے وزیر اعظم کی پشاور گورنر ہاؤس آمد کے موقع پر وزیراعظم سے گورنر کی شکایت کی تھی۔ قبل ازیں چند روز قبل عوامی نیشنل پارٹی کے صوبائی صدر ایمل ولی نے وزیراعظم شہباز شریف سے ملاقات میں اپنے تحفظات سے آگاہ کیا تھا۔ انہوں نے وزیراعظم کو گورنر کے رویے سے متعلق آگاہ کیا تھا او کہا کہ گورنر کا عہدہ سیاسی فائدوں کیلئے استعمال ہورہا ہے۔ انہوں نے کہا کہ خیبرپختونخوا میں گورنر راج نافذ ہے، وفاق اپنے نمائندہ کو آئینی دائرہ اختیار سے تجاوز سے منع کرے، گورنر نے مداخلت بند نہیں کی تو ہم اپنا راستہ اختیار کریں گے۔ خیال رہے کہ گورنر خیبرپختونخوا حاجی غلام علی کا تعلق جمعیت علمائے اسلام سے ہے اور وہ مولانا فضل الرحمن کے قریبی عزیز ہیں۔