آئوٹ سورس ٹرینوں میں وسیع پیمانے پر بے ضابطگیوں کا انکشاف

اسلام آباد(زبیر قصوری)ریلوے پاکستان کی طرف سے آؤٹ سورسنگ کی جانیوالی ٹرینوں کے وسیع پیمانے پر بے ضابطگیاں اور چارجنگ سمیت دیگر درجنوں شکایات پر ڈی سی او پاکستان ریلوے رباب ملک نے تفصیلی خط جاری کیا ہے خط میں ریلوے بھی افسران کو بتایا گیا ہے کہ نجی کمپنی ریلوے پاکستان کی ٹرینوں میں مسافروں کے ساتھ بدتمیزی اوور چارجنگ سمیت پاکستان ریلوے کے ساتھ کیے گئے معاہدے کی خلاف ورزی کر رہی ہیں جس سے ریلوے پاکستان کی ساکھ کو شدید نقصان ہو رہا ہے۔خط کے مطابق نجی کمپنی کے خلاف مختلف حوالوں سے متواتر شکایات موصول ہو رہی ہیں۔ ایس جمیل اینڈ کمپنی جس کو فرید ایکسپریس کا تجارتی انتظام آئوٹ سورس کیا گیا تھا وہ معاہدے کی ذمہ داریاں پوری نہیں کر رہی۔ ڈی سی او کے کام میں بے ضابطگیاں نوٹ کی گئی ہیں۔ ریلوے اسٹیشنز پر کرایہ کا کائونٹر نہیں لگایا گیا۔ پارٹی معاہدے کی شق 5 اور 7 کے مطابق پالیسی پر عمل کرنے میں ناکام رہی ، کمپنی کو اسٹیشنوں اور ٹرینوں میں اوورچارجنگ میں ملوث پایا گیا۔اے سی بزنس کلاس کے روٹ پر اسٹیشن سے اسٹیشن کا کرایہ وصول کرنے کا بندوبست نہیں، عملہ کمپنی لوگو کے ساتھ مناسب یونیفارم نہیں پہنتا۔ 17 مئی 2023 کے ایک چھاپے کا حوالہ دیتے ہوئے کہا گیا ہے کہ ڈائننگ کار مینیجر غیر مجاز اشیاء جیسے ایکوافینا، گورمیٹ اور بینز جوس کے غیر منظور شدہ برانڈ کے منرل واٹر کی فروخت میں ملوث پایا گیا۔ اسی طرح، وہ نامعلوم برانڈ/کمپنی کے دو غیر معیاری گیس سلنڈر استعمال کر رہا تھا جو اوگرا سے منظور شدہ نہیں تھے جبکہ ریلوے کی طرف سے سے جاری کردہ ہدایات کی صریح خلاف ورزی کر رہی ہے ۔ مسافروں کے ساتھ چیکنگ عملے کا ذلت آمیز سلوک ہوتا ہے اور اس حوالے سے مسافروں کی جانب سے درج کرائی گئی شکایات کا حوالہ دیتے ہوئے کہا گیا ہے کہ نجی کمپنی کے خلاف سخت کارروائی کی جائے۔