لاہور سے ارومچی کیلئےچینی ائرلائن کی پروازوں کادوبارہ آغاز

اسلام آباد ( رپورٹ، حنیف خالد )چائنا سدرن ائرلائن کی لاہور سے ارومچی کیلئے دوبارہ پروازوں کا آغاز ہو گیا۔ چائنا سدرن ایئرلائنز نے 2020 میں COVID-19 وباء کے باعث اپنا آپریشن معطل کر دیا تھا۔ گزشتہ روزچائنا سدرن فلائٹ CZ-6017 صبح 7:52 پر لاہور پہنچی اور دن 10:02 پر پرواز CZ-6018 ارومچی کے لیے روانہ ہوئی۔ ترجمان سول ایوی ایشن اتھارٹی کے مطابق اس موقع پر لاہور ائرپورٹ پر تقریب کا انعقاد ہوا جس میں عوامی جمہوریہ چین کے قونصل جنرل ژاؤ شیرین ،ائرپورٹ منیجر نذیر احمد خان، سی ایس او اور ایئر لائن/جی ایچ اے کے نمائندوں نے بھی شرکت کی ۔چینی قونصل جنرل ژاؤ شیرین نے فلائٹ آپریشن دوبارہ شروع کرنے میں تعاون پر ائرپورٹ انتظامیہ اور دیگر ایجنسیوں کا شکریہ ادا کیا۔ انہوں نے ایئر لائن اور مسافروں کے لئے لاہور ارومچی روٹ کی اہمیت پر بھی روشنی ڈالی۔