پاکستان عالمی مالیاتی اداروں کی ادائیگیاں بروقت کریگا، عائشہ غوث پاشا

اسلام آباد (کامرس رپورٹر ) وزیر مملکت خزانہ عائشہ غوث پاشا نے کہا ہےکہ پاکستان پیرس کلب یا عالمی مالیاتی اداروں سمیت بیرونی ادائیگیوں میں ڈیفالٹ نہیں کرے گا ، تمام ادائیگیاں بروقت کریں گے، آئی ایم ایف کے ساتھ مستقل بنیاد پر بات چیت جاری ہے، قوی امید ہے کہ آئی ایم ایف کے ساتھ نویں اقتصادی جائزے کیلئے بات آگے بڑھے گی ، پاکستان اور آئی ایم ایف دونوں معاہدے کے خواہاں ہیں ،ناامیدی کی کوئی وجہ نہیں کیونکہ آئی ایم ایف کے ساتھ وزارت خزانہ روزانہ ہی رابطے میں ہے ، ایف بی آر اور سٹیٹ بنک سے بھی بات چیت ہو چکی ہے، ڈیٹا شیئر ہورہا ہے پارلیمنٹ ہائوس میں میڈیا سے گفتگو کرتے ہوئے وزیر مملکت خزانہ نے کہا کہ پاکستان پیرس کلب یا دیگر عالمی مالیاتی اداروں سے قرضے ری شیڈول نہیں کرائے گا ، البتہ بعض ممالک کے ساتھ دوطرفہ قرضوں کی ری سٹرکچرنگ کیلئے سوچا جا سکتا ہے ، ایک سوال کے جواب میں انہوں نے کہا کہ مجھے نہیں معلوم گورنر سٹیٹ بینک نے اس بارے میں کیا کہا ہے ، وزیر خزانہ اسحاق ڈار پہلے ہی وضاحت کر چکے ہیں ۔ حکومت اوورسیز پاکستانیوں کو بجٹ میں کوئی ایمنسٹی نہیں دے رہی ۔