او جی ڈی سی ایل، حج پر جانے والے ملازمین کے اعزاز میں الوداعی تقریب

اسلام آباد(جنگ نیوز)آئل اینڈ گیس ڈویلپمنٹ کمپنی لمیٹڈ نے 1985 میں اپنے ابتدائی سالوں میں ہر سال چار ملازمین کو حج کی ادائیگی کیلئے سعودی عرب بھجوانے کا سلسلہ شروع کیا جسے اب حج سپانسرشپ سکیم کے تحت ملازمین کی معاونت کرنے کیلئے بتدریج بڑھا دیا گیا۔رواں سال کمپنی نے 55ملازمین کو حج پر بھجوانے کیلئے سپانسر کیا۔ اپنی روایت کو جاری رکھتے ہوئے او جی ڈی سی ایل نے حج کیلئے منتخب ہونے والے ملازمین کے اعزاز میں منگل کو باوقار الوداعی تقریب کا انعقاد کیا۔ تقریب کا مقصد ان خوش نصیب افراد کی تکریم کرنا ہے جن کا کمپنی کی سپانسرڈ سکیم کے ذریعے حج کے مقدس سفر جانے کیلئے قرعہ اندازی کے ذریعے انتخاب کیا گیا۔ احمد حیات لک، ایم ڈی /سی ای او،او جی ڈی سی ایل نے تقریب کی صدارت کی اور حج پر جانے والے خوش نصیب ملازمین کو مبارک باد دی۔