جائیدادوں کا تنازع،سپریم کورٹ کا EOBIکو6ہفتوں میں فیصلہ کرنے کا حکم

14 جون ، 2023

اسلام آباد (صباح نیوز)سپریم کورٹ نے ایمپلائز اولڈ ایج بینیفٹس انسٹی ٹیوشن (ای او بی آئی)کو چھ ہفتوں میں جائیدادوں کے تنازع سے متعلق فیصلہ کرنے کا حکم دے دیا۔ چیف جسٹس آف پاکستان جسٹس عمرعطا بندیال کی سربراہی میں تین رکنی بینچ نے ای او بی آئی کرپشن کیس کی سماعت کی، وکیل مخدوم علی خان نے دلائل دیئے کہ 10سال گزر گئے متاثرین عدالتوں میں ہی پھنسے ہوئے ہیں، عدالت دس سال میں بھی کوئی فیصلہ نہ کرسکی۔چیف جسٹس عمر عطا بندیال نے ریمارکس دیئے کہ 10 سال کے مقابلے میں آج پراپرٹی کی قیمتیں کہاں سے کہاں پہنچ گئی ہوں گی، جن کے کروڑوں پھنسے ہوئے ہیں وہ بھی پاکستانی شہری ہیں، پیسوں کے معاملے پر عدالت عدم اطمینان کا شکار رہتی ہے، افسری کرنے کے بجائے انہیں بتائیں کہ حالات بدل گئے ہیں۔چیف جسٹس نے کہا کہ امید ہے ای او بی آئی دیانت داری کے ساتھ فیصلہ کرے گا، جن کے پیسے واپس کرنے ہیں واپس کریں ورنہ پراپرٹی ان کے حوالے کی جائیں، مسئلے کا حل ای او بی آئی کو نکالنا ہوگا۔ سپریم کورٹ نے سماعت اگست تک ملتوی کردی۔