خدمات کے شعبے میں آئی ٹی ایکسپورٹ کا حصہ سب سے زیادہ 35 فیصد رہا

14 جون ، 2023

اسلام آباد (رپورٹ: حنیف خالد) مالی سال 2023 کے دوران جولائی تا مارچ 2023 کے دوران آئی ٹی کے شعبے میں ایک ارب72 کروڑ ڈالر ٹریڈ سرپلس رہا جوکہ گزشتہ مالی سال کے مقابلے میں 16.7 فیصد رہا ہے، جولائی تا مارچ 2023 سیون سافٹ ویئر ٹیکنالوجی پارکس پنجاب اور سندھ میں بنائے گئے ۔ وزارت خزانہ اکنامک ایڈوائزر ونگ کے سربراہ ڈاکٹر امیتاز احمد کے مطابق سروسز کے شعبے میں آئی ٹی برآمدات کا حصہ سب سے زیادہ 35.1 فیصد رہا، جولائی تا مارچ مالی سال 2023 کے دوران پاکستان سافٹ ویئر ایکسپورٹ بورڈ نے سافٹ ویئر ٹیکنالوجی پارکس فیصل آباد، گجرات، جام شورو، کراچی، ملتان، پشاور راولپنڈی میں بنائے۔ IGNITE نے ایگریکلچر ٹیکنالوجی اور ایئرو سپیس سمیت دوسرے شعبوں کو فروغ دینے کیلئے 8 نیشنل انکوبیشن سنٹرز بنائے۔ نیشنل انکوبیشن سنٹر سے 1317 سٹارٹ اپس شروع کئے جس سے ایک لاکھ 26 ہزار روزگار کے نئے مواقع پیدا ہوئے۔ ان سنٹرز میں 15 ارب 43 کروڑ روپے کی سرمایہ کاری ہوئی اور مجموعی طور پر 9 ارب 13 کروڑ روپے کے محصولات اکٹھے ہوئے۔ اس پروگرام کے تحت اب تک 23 سو خواتین کو کاروباری ٹریننگ دے کر بااختیار بنایا گیا۔ جولائی تا دسمبر مالی سال 2023 کے دوران ٹیلی کمیونیکشن کی صنعت میں 632 ملین ڈالر کی سرمایہ کاری ہوئی، جولائی تا دسمبر مالی سال 2023 کے دوران ٹیلی کام انڈسٹری کے محصولات 137 ارب 70 کروڑ روپے رہے۔