ہرنائی پنجاب کوئٹہ قومی شاہراہوں کی حالت ابتر،عوام کو شدید مشکلات کا سامنا

ہرنائی (نامہ نگار) ہرنائی پنجاب قومی شاہراہ ہرنائی سنجاوی کے درمیان 22 میل سے تنگی ور پانچ ندی تک مکمل طور پر ٹوٹ پھوٹ کا شکار ہے اسی طرح ہرنائی کوئٹہ شاہراہ چپررفٹ کی پہاڑی، مانگی ندی، زردآلو، کھوسٹ، شاہرگ، ناکس تک بارشوں اور ندی نالوں میں اونچے درجے کے سیلابی ریلوں کی وجہ سے شدید متاثر ہوئی ہے بعض مقامات پر تو شاہراہ کا نام و نشان بھی نہیں ہے زردآلو کے مقام پر ایک بہت بڑے رابطہ پل کا آدھا حصہ سیلاب میں بہہ گیا ہے لیکن ایک سال سے زائد کا عرصہ گزرنے کے باوجود اب تک پل کی تعمیر ومرمت کاکام نہیں ہوا ہے شاہراہوں کی خستہ حالی بڑا مسئلہ ہے بارشوں اور سیلاب کے دوران ہرنائی کا ملک بھر سے زمینی رابطہ کٹ جاتا ہےعوام کو شدید مشکلات کاسامنا کرناپڑتا ہے 28 اپریل2021 کو سابق وزیراعظم عمران خان نے این ایچ اے کی زیرنگرانی ہرنائی کوئٹہ اور ہرنائی پنجاب شاہراہوں کی تعمیر کےکام کا افتتاح کیا کمپنی نے کام شروع کیا مگر کمپنی کے لیبر کیمپ پر نامعلوم افراد نے حملے کرکے کمپنی کی مشنری کو نذرآتش کیا جس کے بعد تعمیراتی کمپنی نے کام روک دیا جس سے شاہراہیں مزید بگڑگئی ہیں ان دونوں شاہراہوں سفر کرنا کسی عذاب سے کم نہیں ہے عوامی حلقوں نے مطالبہ کیا ہے کہ قومی شاہراہوں کا تعمیراتی کام جلدشروع کیاجائے۔