حلقہ انتخاب کے دیرینہ مسائل کے حل کیلئے کوشاں ہوں‘ میر زابد ریکی

واشک (نامہ نگار)ایم پی اے حاجی میر زابد علی ریکی نے کہاہے کہ عوامی مسائل کا حل اولین ترجیح ہے واشک کی پسماندگی کے خلاف کمربستہ ہوں دستیاب وسائل میں حلقہ انتخاب کے عوام کے دیرینہ مسائل حل کرنے کیلئے کوشاں ہوں وزیر اعلی بلوچستان میر عبدالقدوس بزنجو واشک کے بنیادی مسائل حل اور پسماندہ اضلاع کو ترجیح دے رہے ہیں ان خیالات کا اظہار انہوں نے شاہوگیڑی گڑانگ و دیگر علاقوں کے دورے کے موقع پر وفود سے گفتگو کرتے ہوئے کیا حاجی میر زابد علی ریکی نے کہا کہ سابقہ صوبائی حکومت میں واشک کو انتقامی کارروائیوں کا نشانہ بنایا گیا جس کا اعتراف سابق وزیر اعلی نے خود اسمبلی فورم پر کیا انھوں نے کہا کہ اقتدار اور کرسی آنی اور جانی والی شے ہے واشک کے عوام کے حقوق پر ماضی میں ڈاکہ ڈالا گیا اجتماعی نوعیت کی اسکیموں میں رکاوٹیں ڈالی گئیں انہوں نے کہا کہ واشک کی ترقی کے لیئے دن رات کوشاں رہوں گا حلقہ انتخاب کے تمام علاقوں کو یکساں ترجیع دیکر آگے بڑھ رہا ہوں اس موقع پر مقامی معتبرین نے درپیش مسائل سے ایم پی اے کو آگاہ کیا۔