خواجہ آصف نے وائس چانسلرز کو ڈکیت کہنے پر معذرت کرلی

اسلام آ باد(پی پی آ ئی) قومی اسمبلی کے اجلاس میں وزیر دفاع خواجہ آصف نے بجٹ تقریر میں وائس چانسلرز کے حوالے سے ادا کئے گئے الفاظ پر معذرت کر لی جبکہ اسپیکر نے ایوان کی کارروائی سے یہ الفاظ حذف کرا دیئے۔ قومی اسمبلی میں جاری اجلاس میں وزیر دفاع خواجہ آصف نے بجٹ تقریر کے دوران یونیورسٹیز کے وائس چانسلرز کو ڈکیت کہنے پر ایوان میں معذرت کرلی ، انہوں نے کہا کہ یونیورسٹی وائس چانسلر کے بارے میں یہ لفظ استعمال کرنے پر معافی مانگتا ہوں، گزارش کرتا ہوں کہ اسمبلی کارروائی سے بھی اس جملے کو حذف کیا جائے۔ درس گاہوں اور اساتذہ کا میرے نزدیک بڑا احترام ہے، آج ملک میں کرپشن ایک روایت بن گئی ہے، درس گاہوں میں ہمارے اس ایوان سے زیادہ سیاست ہے۔