سٹاک مارکیٹ میں مندا برقرار،ملکی معاشی صورتحال اثرانداز

لاہور (سودی)رواں کاروباری ہفتے کے آخری روز جمعہ کو بھی سٹاک مارکیٹ میں دن بھر کے اتار چڑھائو کے بعدکاروبار کا اختتام مندے پر ہی ہوا آخر میں بیشتر کمپنیوں کے حصص کی قیمتوں میں کمی تھی جبکہ انڈیکس اور مجموعی مالیت بھی کم ہو گئی۔ مارکیٹ میں کاروبار کا آغاز تیزی سے ہوا جو کافی دیر تک جاری رہی پھر اتار چڑھائو آتا رہا اور اس کے بعد شروع ہونے والا پریشر آخر تک جاری تھا اس دوران انڈیکس میں244پوائنٹ کا اضافہ بھی ہوا اور 89پوائنٹ کی کمی بھی۔ گزشتہ روز بھی پلیئرز اور بڑے سرمایہ کار زیادہ تر سائیڈ لائن ہی رہے جبکہ مارکیٹ پر ملکی معاشی حالات زیادہ اثر انداز تھے متاثر کرنے والے عناصر میں آئی ایم ایف سے معاملات طے نہ ہو سکا اور حکومت کا مہنگے پلان بی پر عمل درآمد شروع کرنا، کمپنیوں کی طرف سے بلائے گئے بورڈ اور جنرل اجلاس ملتوی کرنا اور اس کے نتیجہ میں بونس حصص کے اجرا کی امید ختم ہو جانا ، عالمی کریڈٹ ریٹنگ ایجنسیوں کی طرف سے پاکستان سے متعلق منفی ریمارکس اوربجٹ اعلانات شامل تھے گزشتہ روز کمپنیوں، میوچل فنڈز اور بیرونی سرمایہ کاروں کی نیٹ سیل تھی جبکہ بینکوں، بروکروں اور نجی سرمایہ کاروں نے نیٹ خریداری کی۔ کاروبار کے اختتام پر مارکیٹ انڈیکس 68پوائنٹ کم ہو کر 41301کی سطح پر آ گیا۔ 109کمپنیوں میں اضافہ، 187میں کمی اور 32میں استحکام رہا۔ 15کروڑ 60لاکھ حصص کا کاروبار ہوا۔