یونان کشتی حادثہ،سیکڑوں لاپتہ افراد میں41پاکستانی بھی شامل

کراچی (نیوز ڈیسک) یونان میں دو روز قبل تارکین وطن کی کشتی ڈوبنے سےلاپتہ سیکڑوں افراد کے زندہ بچنے کی امید دم توڑ گئی ہے ، لاپتہ ہونے والوں میں 41 پاکستانی شہری بھی شامل ہیں ، ان کا تعلق آزاد کشمیر کے علاقے کوٹلی سے ہے۔ضلعی انتظامیہ کے مطابق کھوئی رٹہ کے نواحی گاؤں بنڈلی کے ایک ہی خاندان کے 12 افراد لاپتہ ہیں۔4 نوجوان کھوئی رٹہ کے نواحی گاؤں گوڑا بلیال اور دیگر ڈنہ کے رہائشی ہیں۔ضلعی انتظامیہ کے مطابق 43 نوجوانوں میں سے 2 افراد بچ گئے، باقی لاپتہ ہیں۔اہل خانہ کا کہنا تھا کہ تمام نوجوان روزگار کے سلسلے میں غیر قانونی طور پر اٹلی اور یونان جا رہے تھے۔ایتھنز سے ملنے والی اطلاع کے مطابق حادثے میں 79 تارکین وطن ڈوب گئے۔ ریسکیو حکام کے مطابق سیکڑوں لاپتا ہیں۔ریسکیو حکام نے مزید بتایا کہ کشتی کے 104 مسافروں کو بچالیا گیا ہے۔ انہوں نے کہا کہ 65 سے 100 فٹ لمبی کشتی میں ممکنہ طور پر 750 افراد سوار تھے۔