پاکستان سے روس کو چاول کی برآمدات میں اضافہ

اسلام آباد (خصوصی نمائندہ) پاکستان سے روس کو چاول کی برآمدات میں اضافہ حاصل کرلیا گیا۔ وفاقی وزیر برائے نیشنل فوڈ سکیورٹی اینڈ ریسرچ (این ایف ایس آر) طارق بشیر چیمہ کی قیادت اور وزارت کے سیکرٹری ظفر حسن کی رہنمائی میں ڈیپارٹمنٹ آف پلانٹ پروڈکشن (ڈی پی پی) نے روس کو چاول برآمد کرنے کے لئے مزید 15 اداروں کی منظوری حاصل کرنے میں کامیابی حاصل کر لی۔ روس کی فیڈرل سروس برائے ویٹرنری اینڈ فائٹو سینٹری سرویلنس نے محکمہ پلانٹ پروٹیکشن (ڈی پی پی) وزارت نیشنل فوڈ سکیورٹی اینڈ ریسرچ پاکستان کو اس امر کی تصدیق کی ہے کہ مزید 15 رائس ملیں جن کی ڈی پی پی کے ٹیکنیکل آڈٹ کے بعد سفارش کی گئی تھی، اب روس کو چاول برآمد کر سکتی ہیں۔ یہ برآمدات اور ریاست کی مجموعی معیشت کو فروغ دینے کی طرف بڑی کامیابی ہے۔ محکمہ پلانٹ پروٹیکشن نے رائس ایکسپورٹرز ایسوسی ایشن آف پاکستان کے تعاون سے چاول کی برآمدات کے لئے ایس پی ایس کی شرائط کی تعمیل کے لئے روسی فیڈریشن کی طرف سے تجویز کردہ گائیڈنس دستاویز کے مطابق مزید 15 ملوں کو اپ گریڈ کرنے کے لئے خصوصی اقدامات کئے۔ اب پاکستان سے چاول کے 19 ادارے روسی فیڈریشن کو چاول برآمد کر سکتے ہیں۔