وزیراعظم سے فضل الرحمٰن اور پیپلزپارٹی کے وفد کی ملاقاتیں

اسلام آباد( نیوز رپورٹر) وزیر اعظم شہباز شریف سے فضل الرحمن اور پیپلزپارٹی کے وفد کی ملاقاتیں ، ملکی سیاسی صورتحال پر تفصیلی مشاورت، وفود نے معاشی مشکلات کے باوجود بجٹ میں عوامی فلاح کیلئے اٹھائے گئے اقدامات پر وزیرِ اعظم کو خراجِ تحسین پیش کیا،مولانا فضل الرحمٰن نے بجٹ میں ترقیاتی منصوبوں اور عوامی مشکلات کے ازالے کے اقدامات کی شمولیت کو سراہا جبکہ خیبر پختونخوا بالخصوص ضم شدہ اضلاع کی ترقی کیلئے خصوصی اقدامات کی تعریف کی، پی پی وفد میں وزیرِ تجارت سید نوید قمر، وزیرِ موسمیاتی تبدیلی شیری رحمن، وزیرِ آبی وسائل سید خورشید شاہ، مشیر وزیرِ اعظم برائے کشمیر و گلگت بلتستان امور قمر الزمان کائرہ، وزیرِ اعلی سندھ سید مراد علی شاہ اور سینیٹر نثار کھوڑو شامل تھے ،ملاقات میں وزیرِ خزانہ اسحاق ڈار اور وزیرِ منصوبہ بندی احسن اقبال بھی موجود تھے، دریں اثنا وزیراعظم سے جعفر خان مندوخیل کی زیر قیادت مسلم لیگ (ن) بلوچستان کے 8 رکنی وفد جمال شاہ کاکڑ، سردار یعقوب ناصر، آغا شاہ زیب درانی، عامر افضل مندوخیل، چوہدری نعیم، نصیر اچکزئی اور ظہیر خان کاکڑ نے ملاقات کی جس میں موجودہ سیاسی صورتحال پر تفصیلی مشاورت کی گئی،وفد نے بجٹ میں بلوچستان کے لیے خصوصی منصوبے شامل کرنے پر وزیراعظم سے اظہار تشکرکیا،دریں اثناء وزیرِ اعظم کی زیرِ صدارت اسلام آباد میں جاری بڑے ترقیاتی منصوبوں پر جائزہ اجلاس ہوا ،اس موقع پر انہوں نے کہا کہ ترقیاتی منصوبوں کی تعمیر میں کسی قسم کا تعطل قبول نہیں، معینہ مدت میں تکمیل یقینی بنائی جائے ، معیار پر کسی قسم کا سمجھوتہ نہیں کیا جائیگا ،چیئرمین سی ڈی اے تعمیراتی کام کی خود نگرانی کرکے معیار کو یقینی بنائیں،ترقیاتی منصوبوں کی لینڈ اسکیپنگ پر خصوصی توجہ دی جائے ،لینڈ اسکیپنگ کرتے وقت بین الاقوامی معیار کو مدنظر رکھا جائے۔