ن لیگ اجلاس میں نواز شریف کو خراج تحسین سمیت دیگر قراردادیں منظور

اسلام آباد ( خصوصی نامہ نگار ) مسلم لیگ (ن) کی نومنتخب سیکرٹری اطلاعات مریم اورنگزیب نے جنرل کونسل اجلاس میں قائد نواز شریف، صدر شہباز شریف، چیف آرگنائزر مریم نواز، پارٹی قائدین، رہنمائوں اور کارکنوں، عوام کو خراج تحسین پیش کرنے، کشمیر کے عوام سے یکجہتی کا اظہار کرنے سمیت سانحہ 9 مئی 2023ءکی مذمت کرنے سے متعلق قراردادیں پیش کیں جو جنرل کونسل نے متفقہ طور پر منظور کر لیں۔ مریم اورنگزیب نے پارٹی کا شکریہ ادا کرتے ہوئے کہا کہ مسلم لیگ (ن) کی سیکرٹری اطلاعات منتخب ہونا ان کے لئے باعث فخر ہے،اجلاس میں مریم اورنگزیب نے قرارداد پیش کی کہ مسلم لیگ (ن) کی جنرل کونسل کا اجلاس اپنے قائد نواز شریف کی جرات، ہمت اور بصیرت کو سلام پیش کرتا ہے جنہوں نے بدترین جبر اور سیاسی انتقام کا ثابت قدمی، صبر اور بہادری سے مقابلہ کیا،انہوں نے پارٹی صدر اور وزیراعظم شہباز شریف کو خراج تحسین پیش کرنے کی قرارداد بھی پیش کی جس میں کہا گیا کہ شہباز شریف نے اپریل 2022ءمیں وزارت عظمیٰ کی ذمہ داری سنبھالنے کے بعد ریاست پر سیاست کو قربان کرتے ہوئے پاکستان کی عوام کے معاشی استحکام کے لئے قومی مفادات میں فیصلے کئے،انہیں زبردست خراج تحسین پیش کرتے ہیں ،مریم اورنگزیب نے پارٹی قائدین، رہنمائوں اور کارکنوں کو خراج تحسین پیش کرنے کی قرارداد پیش کی جس میں کہا گیا کہ قائدین، رہنمائوں اور پارٹی کارکنوں نے سیاسی آزمائش اور بدترین جبر کے دور میں قیادت اور پارٹی کے ساتھ وفاداری اور نظریاتی وابستگی کا بے مثال مظاہرہ کیا ،مریم اورنگزیب نے کشمیر کاز کے ساتھ تاریخی، روایتی اور اٹوٹ وابستگی کا اعادہ کرتے ہوئے مقبوضہ جموں و کشمیر کے بہادر عوام سے یکجہتی کا اظہار کرنے کی قرارداد بھی پیش کی جس میں کہا گیا کہ پاکستان مسلم لیگ (ن) کی جنرل کونسل کا یہ اجلاس کشمیر کاز کے ساتھ اپنی تاریخی روایتی اور اٹوٹ وابستگی کا اعادہ کرتے ہوئے مقبوضہ جموں و کشمیر کے بہادر عوام سے مکمل یکجہتی کا اظہار کرتا ہے،تمام قراردادیں منظور کرلی گئیں۔