میئر کے انتخاب میں پی پی فسطائیت کیخلاف جماعت اسلامی نے یوم سیاہ منایا

کراچی (اسٹاف رپورٹر) کراچی میئر کے انتخابات میں حکومتی جماعت پیپلزپارٹی کے جمہوریت دشمن رویے اور فسطائیت کے خلاف امیر جماعت اسلامی سراج الحق کی اپیل پر جمعہ کو اعلانیہ یوم سیاہ کے سلسلے میں آج جماعت اسلامی سندھ کے تحت بھی کراچی تا کشمور یومِ سیاہ منایا گیا،مظاہرین نے ہاتھوں پر سیاہ پٹیاں باندھی ہوئی تھیں اور فلک شگاف نعرے بازی کررہے تھے۔تفصیلات کےمطابق صوبائی ترجمان مجاہد چنا کے مطابق جمعہ کو سکھر،جیکب آباد،کندھ کوٹ، شکارپور،لاڑکانہ، خیرپور، کنڈیارو، سانگھڑ،حیدرآباد، ٹنڈوالہیار ، بد ین ،ٹھٹہ، ٹنڈومحمد خان سمیت دیگر شہروں میں احتجاجی مظاہرے کئے گئے ،مظاہرین نے ہاتھوں میں پلے کارڈ اٹھارکھے تھے جن پر”ظلم کے یہ ضابطے ہم نہیں مانتے،غنڈہ گردی نامنظور،جعلی میئرنامنظور،پیپلزپارٹی کی دہشتگردی مردہ باد“کے نعرے درج تھے جبکہ مظاہرین نے ہاتھوں پر سیاہ پٹیاں باندھی ہوئی تھیں اور فلک شگاف نعرے بازی کررہے تھے۔مظاہروں سے صوبائی،ضلعی اور مقامی رہنمائوں نے خطاب کرتے ہوئے کہا کہ کراچی میئر کے الیکشن میں طاقت کے ذریعے سے اکثریت کو اقلیت میں بدل کر جو کھیل کھیلا گیا ہےیہ بنیادی انسانی حقوق کی خلاف ورزی ہے۔