بلاول کا چیلنج قبول، ن لیگ الیکشن کیلئے تیار ہے، طلال چوہدری

کراچی (ٹی وی رپورٹ)مسلم لیگ (ن) کے سینئر رہنما طلال چوہدری نے بلاول بھٹو کا چیلنج قبول کرتے ہوئے کہا ہے کہ ن لیگ الیکشن کیلئے تیار ہے، عام انتخابات آزاد کشمیر اور میئر کراچی کے الیکشن کی طرح نہیں ہونے چاہئیں ، آزاد کشمیر الیکشن پر ہمارے تحفظات ہیں، میئر کراچی کے الیکشن پر بھی سوالات اٹھ رہے ہیں،پی ٹی آئی حکومت کیخلاف عدم اعتماد پیپلزپارٹی کے ایڈوائس پر آئی، مسلم لیگ (ن) اورجے یو آئی نئے انتخابات چاہتی تھی،اسحاق ڈار اکیلے فیصلے نہیں کرتے، کابینہ کو بریفنگ دیتےہیں۔ان خیالات کا اظہار انہوں نے جیو نیوز کے پروگرام ’’نیا پاکستان‘‘ میں گفتگو کرتے ہوئےکیا۔ ن لیگ کے سینئر رہنما طلال چوہدری نے کہا کہ ن لیگ اور جے یو آئی تو نئے انتخابات چاہتی تھیں، اسمبلی کی مدت پوری کرنے کیلئے تمام اتحادی متفق تھے، ن لیگ الیکشن لڑنے کیلئے تیار ہے بھرپور طریقے سے لڑیں گے، 2013ء کے نتائج دہرائے جاتے نظر آرہے ہیں، بلاول بھٹو زرداری کا چیلنج قبول کرتے ہیں، صاف و شفاف الیکشن ملک کی ضرورت ہے۔