حساس ادار ےنے کرنسی اسمگلنگ روکنے کیلئے نیا یونٹ تشکیل دے دیا

کراچی (اسد ابن حسن) ایک حساس ادارے نے بیرون ملک کرنسی اسمگل کرنے کے حوالے سے ایک اینٹی منی لانڈرنگ یونٹ قائم کیا ہے اس کا فوکس فی الحال لاہور اور اس کا ایئرپورٹ ہے کیونکہ وہاں ایف آئی اے کا مخبری نظام یا تو فیل ہوچکا ہے یا پھر مبینہ طور پر متعلقہ افسران منی چینجرز سے مل گئے ہیں۔ اس نئے یونٹ نے اپنے مخبری نیٹ ورک کو اتنا فعال کردیا ہے کہ گزشتہ 15/20دنوں میں لاہور ایئرپورٹ پر اے ایس ایف کو دی گئی معلومات کے بعد 4کارروائیوں میں لاہور ایئرپورٹ سے جانے والے مسافروں سے کئی کروڑ روپے کی غیر ملکی کرنسی، ان کے لگیج سے برآمد کی گئی۔ مذکورہ حساس ادارے کی کارکردگی اس لیے عمدہ ہے کہ اس کے پاس بہترین ٹیکنالوجی ،بڑی ورک فورس اور مخبروں کا جال ہے۔ باوثوق ذرائع کے مطابق آج کل کرنسی اسمگلنگ کا زیادہ کام لاہور کے علامہ اقبال انٹرنیشنل ایئرپورٹ سے ہورہا ہے مگر یہ اطلاعات بھی ہیں کہ ملتان اور سیالکوٹ ایئرپورٹس سے بھی تھوڑا بہت کام ہورہا ہے۔ لاہور سے ہی غیر ملکی کرنسی کی اسمگلنگ پشاور اور پھر افغانستان بھی بڑھ گئی ہے کیونکہ اس میں ایک ’’گرے مارکیٹ‘‘ میں کام کرنے والے منی ایکسچینجرز ملوث ہیں کیونکہ اس گھناؤنے کاروبار میں مارکیٹ سے فی ڈالر 10/15زیادہ ملتے ہیں۔ اس حوالے سے کوئی قانونی دستاویزات طلب نہیں کی جاتیں۔ لاہور سے روزانہ کی بنیاد پر کروڑوں روپے کی غیر ملکی کرنسی پشاور اور افغانستان اسمگل ہورہی ہے۔