بھارت میں حجاب پر پابندی ، علماءکونسل جمعہ کو یوم یکجہتی دختران منائیگی

لاہور(خبر نگار)پاکستان علماءکونسل اور انٹرنیشنل اسلامک کونسل کی اپیل پر ہندوستان میں مسلسل اقلیتوں اور مسلمانوں پر ہونے والے مظالم اور حجاب پر پابندی اور مسلمان خواتین کی بے حرمتی پر جمعة المبارک 11 فروری کو ”یوم یکجہتی دختران ہندوستان“ منایا جائے گا ، اس موقع پر پاکستان سمیت پورے عالم اسلام میں ہندوستان کے مظالم کی بھرپور مذمت کی جائے گی اور ہندوستان کی اقلیتوں اور مظلوم مسلمانوں اور دختران ہندوستان کے ساتھ یکجہتی کا اظہار کیا جائے گا، ہندوستانی مظالم پر اسلامی تعاون تنظیم ، رابطہ عالم اسلامی سمیت تمام عالم اسلام کے اہم قائدین کو خطوط روانہ کر رہے ہیں، یہ بات چیئرمین پاکستان علماءکونسل و انٹرنیشنل اسلامک کونسل حافظ محمد طاہر محمود اشرفی ، سیکرٹری جنرل ڈاکٹر پروفیسر ابو بکر صدیق، مولانا قاسم قاسمی ، مولانا نعمان حاشر ، مولانا طاہر عقیل اعوان، مولانا شہباز احمد، مولانا محمد اشفاق پتافی، مولانا محمد شفیع قاسمی، مولانا عاطف تنویر، صاحبزادہ حافظ ثاقب منیر اور دیگر قائدین نے پریس کانفرنس سے خطاب کرتے ہوئے کہی۔ انہوں نے کہا کہ ہندوستانی مظالم کا سلسلہ روز و شب بڑھ رہا ہے اور اس کے خاتمے کیلئے عالم اسلام اور عالمی دنیا کو بھرپور آواز بلند کرنا ہو گی۔ انہوں نے کہا کہ ایک مسلم بیٹی نے وحشت اور دہشت کے سامنے جس انداز سے اپنے حجاب اور اپنے دین کے شعائر کا تحفظ کیا ہے اس پر پوری امت مسلمہ اسے سلام پیش کرتی ہے۔ پاکستان علماءکونسل کے یوم تاسیس کے حوالے سے 22 فروری تا 7 مارچ ملک بھر میں پیغام پاکستان علماءو مشائخ کنونشن منعقد ہوں گے، اس سلسلہ میں 27 فروری کو لاہور ، 3 مارچ کو فیصل آباد، 5 مارچ کو ساہیوال اور 7 مارچ کو اسلام آباد میں پیغام پاکستان علماءو مشائخ کانفرنس ہو گی جس میں تمام مکاتب فکر کے علماءو مشائخ اور اسلامی ممالک کے سفراءشریک ہوں گے۔