سیاسی منظر نامہ ،فیصل واوڈا کی تاحیات نااہلی سیاسی منظرنامے کا اہم واقعہ

10 فروری ، 2022

اسلام آباد ( طاہر خلیل ) فیصل آباد میں اپوزیشن پر وزیر اعظم کی حسب سابق برہمی کے ساتھ پی ٹی آئی کے فیصل ووڈا کی تاحیات نا اہلی کا فیصلہ سیاسی منظر نامے کے اہم واقعات کی حیثیت سے اجاگر ہوئے۔ فیصل آباد میں وزیر اعظم عمران خان نےبلاول بھٹو کی اردو دانی کا مذاق اڑایا کہ بارش ہوتی ہے تو پانی آتا ہے ، اسی طرح شہباز شریف کی نقل اتاری کہ پیٹ پھاڑ کر قومی رقم نکلوائوں گا ۔ اس کے جواب میں پی پی پی نے سوشل میڈیا پر وزیر اعظم کے حلف نامے کی عبار ت غلط پڑھنے والے جملے دہرا دیئے ،پی پی پی اور تحریک انصاف کی سیاسی جنگ اب سوشل میڈیا پر لڑی جا رہی ہے ،جس سے بخوبی اندازہ کیا جا سکتا ہے کہ 2023 کی انتخابی مہم میں وہی کامیاب ہو گا جو سوشل میڈیاکے ذریعے رسائی پائے گا، بعض لوگ سمجھتے ہیں کہ اسے جمہوریت کا انتقام ہی کہا جائے گا کہ میاں شہباز شریف چوہدری شجاعت حسین اور چوہدری پرویز الہٰی سےملاقات کرنے ان کے گھر جائیں گے ، حکمران جماعت کی رابطہ عوام مہم میں تیزی آگئی ہے ، ہر آنے والا دن پی ٹی آئی کیلئے بھاری ثابت ہو رہا ہے ، الیکشن کمیشن کے فیصلے پی ٹی آئی کیلئے بڑا دھچکا ہیں۔