یارک شائر پولیس کے چھاپے، بھنگ کے2 ملین پونڈ مالیت کے پودے ضبط

لندن (پی اے) ویسٹ یارک شائر پولیس نے Liversedge میں ایک سابق کمرشل جگہ پر چھاپے مار کربھنگ کے2ملین پونڈ مالیت کے کم وبیش 4,000 پودے ضبط کرلئے۔ پولیس نے موقع سے5افراد کو منشیات سپلائی کرنے کی نیت سے انھیں اپنے پاس رکھنے کے شبہے میں گرفتار کرلیا۔ اس جگہ کا فارنزک معائنہ کیا جا رہا ہے۔ انسپکٹر وینیسا برگز کا کہنا ہے کہ اتنی بڑی تعداد میں بھنگ کے پودوں کی ضبطی کے بعد اب معاملے کی تفتیش کی جارہی ہے۔ بھنگ کی کاشت اور بھنگ سے بنی ہوئی اشیاء کی خریدوفروخت منظم جرائم کے زمرے میں آتی ہے، جس سے مزید کرمنل سرگرمیوں کو فروغ ملتا ہے، جس سے کمیونٹیز کے مصائب میں اضافہ ہوتا ہے۔ انھوں نے کہا کہ میں باٹلے اور اسپن کے علاقے کے لوگوں کی مشکور ہوں، جنھوں نے ہمیں اس نشہ آور شے کی تیاری اور مجرمانہ سرگرمیوں سے مطلع رکھا۔