خدیجہ شاہ نے جسمانی ریمانڈ کے خلاف لاہور ہائیکورٹ سے رجوع کر لیا

لاہور(اے پی پی)فیشن ڈیزائنر خدیجہ شاہ نے انسداد دہشت گردی عدالت کی جانب سے جسمانی ریمانڈ دینے کے فیصلے کے خلاف لاہور ہائیکورٹ سے رجوع کر لیا۔درخواست خدیجہ شاہ کے وکیل سمیر کھوسہ نے لاہور ہائیکورٹ میں دائر کی ہے جس میں موقف اختیار کیا گیا ہے کہ درخواست گزار کا 9 مئی واقعہ سے کوئی تعلق نہیں،پولیس نے عدالتی حکم کے باوجود تفتیش مکمل نہیں کی ،سیاسی بنیادوں پر مقدمہ میں نئی دفعات شامل کر لی ہیں۔ درخواست میں مزید موقف اختیار کیا گیا ہے کہ پولیس نے نئی دفعات شامل کرنے کے بعد دوبارہ ریمانڈ کے لیے عدالت میں پیش کیا۔ پولیس کا اقدام بدنیتی پر مبنی ہے لہذا عدالت ٹرائل کورٹ کی جانب سے دوبارہ جسمانی ریمانڈ دینے کے فیصلے کو کالعدم قرار دے۔