سپریم کورٹ،90دن میں انتخابات، تحریک انصاف کی درخواست اعتراضات کے بعد واپس

اسلام آباد(ٹی وی رپورٹ)سپریم کورٹ میں90دن میں انتخابات کرانے کیلئے پاکستان تحریک انصاف کی درخواست اعتراضات کے بعد واپس کردی گئی، بغاوت کیس میں فواد چوہدری پر فرد جرم27ستمبر کوعائد ہوگی۔ ذرائع کے مطابق رجسٹرار سپریم کورٹ نے بیرسٹر علی ظفر کے توسط سے دائر پی ٹی آئی کی 90دن میں الیکشن کرانے کی درخواست اعتراضات عائد کرکے واپس کردیا عتراضات میں کہا گیا ہے کہ درخواست گزار نے سپریم کورٹ آنے سے قبل کسی متعلقہ فورم سے رجوع نہیں کیا، صدر مملکت کو آرٹیکل 248 کے مطابق درخواست میں فریق نہیں بنایا جاسکتا، درخواست میں نہیں بتایا گیا کہ درخواست گزار کا کونسا بنیادی حق متاثر ہوا۔ اس کے علاوہ درخواست میں آرٹیکل 184/3 کے تقاضے پورے نہیں کئے گئے۔ علاوہ ازیں ڈسٹرکٹ اینڈ سیشن کورٹ اسلام آباد کے جج طاہر عباس سپرا نے سابق وفاقی وزیر فواد چوہدری پر سرکاری ملازمین کو بغاوت پر اکسانے کے کیس میں فرد جرم عائد کرنے کیلئے 27ستمبر مقرر کر دی۔ پراسیکیوشن کی جانب سے کیس کے ریکارڈ کی مصدقہ نقول وکیل صفائی کو دی گئیں۔تفتیشی افسر محمد علی ریکارڈ سمیت جبکہ فواد چوہدری اپنے وکیل فیصل فرید کے ہمراہ جج طاہر عباس سپرا کی عدالت میں پیش ہوئے۔