ماضی میں حالات کا جائزہ لیے بغیر یونیورسٹی کے کیمپسز قائم کئے گئے،گورنر

کوئٹہ(خ ن) گورنر بلوچستان ملک عبدالولی خان کاکڑ نے کہاہے کہ معاشرے میں یونیورسٹی کے قیام کا مقصد اپنی نئی نسل کو موثر تعلیمی اور تحقیقی ماحول فراہم کرنا ہے۔لہٰذا ضروری ہے کہ آپ بھی حقوق اور فرائض کے محدود خول سے نکل کر انقلابی بنیادوں پر قوم کے بہترین مفاد کیلئے ہر دم پر عزم رہے۔ یہ بات انہوں نے جمعرات کو بیوٹمز یونیورسٹی کے گیارہویں سینٹ اجلاس کی صدارت کرتے ہوئے کہی۔ اس موقع پر نگران صوبائی وزیر قادر بخش بلوچ، وائس چانسلر بیوٹمز یونیورسٹی ڈاکٹر خالد حفیظ شیخ ، وائس چانسلر وویمن یونیورسٹی ڈاکٹر ساجدہ نورین ،صوبائی سیکرٹریز اکبر حریفال، حفیظ جمالی، پرنسپل سیکرٹری ٹو گورنر بلوچستان ہاشم خان غلزئی، ایڈیشنل سیکرٹری فنانس ممتاز لانگو، ایڈیشنل سیکرٹری شکیل، ہائیر ایجوکیشن کمیشن کے ڈائریکٹر جنرل ڈاکٹر ظہور بازئی سمیت بیوٹمز یونیورسٹی سینٹ کے ممبران بھی موجود تھے۔ گورنر بلوچستان ملک عبدالولی خان کاکڑ نے کہا کہ بلوچستان پبلک سیکٹر یونیورسٹیز کو درپیش مالی مسائل کو دیکھ کر دکھ تو ہوتا ہے ۔ماضی میں معروضی حالات کا درست جائزہ لیے بغیر سیاسی دباؤ کے پیش نظر مختلف اضلاع میں یونیورسٹی کے کیمپسز قائم کیے گئے۔ جو مالی مسائل میں اضافہ کا باعث بنے۔