سٹی بینک،مینجمنٹ کی غیرضروری تہیں ختم، شاہ میرخالق CEOسے رابطے میں رہیںگے

نیویارک ( رائٹرز) سٹی گروپ نے اپنی تنظیم نو کرتے ہوئے مینجمنٹ کی غیر ضروری تہیں ہٹا دی ہیں اور اب چیف ایگز یکٹو جین فریزر بینک کی پانچ کورسروسز کے سربراہوں سے براہ راست رابطے میں رہیں گی،جو پانچ سربراہان ان سے براہ راست رابطے مٰیں رہیں گے ان میں بینک کے سروسز یونٹ کے انچارج شاہ میر خالق بھی شامل ہیں۔ وہ کراچی یونیورسٹی ، لندن اسکول آف اکنامکس اور لندن بزنس اسکول سے فارغ التحصیل ہیں اور وہ تیس برس سے بینک سے وابستہ ہیں ۔2021میں وہ بینک کے ٹریثری اینڈ ٹریڈ سلوشن کی برانچ کے سربراہ بنے تھے۔ سی ای او فریزر نے بدھ کو ایک کانفرنس کے دوران سرمایہ کاروں سے خطاب میں انہیں خراج تحسین پیش کرتے ہوئے کہاہ کہ شاہ میر خالق کا بینکنگ کی صنعت میں ثابت شدہ بہترین ریکارڈ ہے۔ جنگ نیوز کے مطابق سٹی بینک کی ویب سائٹ پر شاہ میر خالق کا جو ریکارڈ دستیاب ہے اس کے مطابقوہ بینک کے ہیڈ آف سروسز ہیں اور اس میں بینک کی ٹریٹری اینڈ ٹریڈ اسلوشن کا شعبہ اور سیکوریٹرز سروسز بزنس کا شعبہ بھی شامل ہیں جو کہ نقد رقوم کا انتظام کرتا ہے۔ یہ شعبہ کیپٹل سلوشن اورپوسٹ ٹریڈ سیکورٹیز سروسز بھی بینک کے گلوبل نیٹ ورک کو فراہم کرتا ہے۔ شاہ میر خالق سٹی بینک کی ایگزیکٹو مینجمنٹ ٹیم کا حصہ بھی ہیں ۔ اس سے قبل وہ بزنس میں ہیڈ آف آپریشنز اور ٹیکنالوجی بھی تھے۔