سونا مافیا اور اسمگلرز کی فہرست تیار، کریک ڈائون شروع

اسلام آباد (محمد انیس) انٹیلی جنس ایجنسیوں اور قانون نافذ کرنے والے اداروں نے سونا مافیا اور اسمگلروں کیخلاف ایک بڑا کریک ڈائون شروع کر دیا ہے۔ ذرائع کا کہنا ہے کہ انٹیلی جنس اور دیگر قانون نافذ کرنے والی ایجنسیوں پر مشتمل ایک ٹاسک فورس تشکیل دی گئی ہے جو گولڈ مافیا اور اسمگلرز کیخلاف فیصلہ کن کارروائی کرے گی، جس کا مقصد ان کی گرفتاری اور ان کیخلاف قانونی کارروائی کرنا ہے۔ یہ بھی معلوم ہوا ہے کہ ٹاسک فورس نے مافیاز اور اسمگلرز کی فہرست تیار کر لی ہے اور جلد ان کیخلاف کارروائی ہونے والی ہے۔ مزید برآں، حکومت نے جنگی بنیادوں پر سونے کی خرید و فروخت کو کمپیوٹرائزڈ کرنے کا فیصلہ کیا ہے تاکہ سونے کا کاروبار کرنے والوں کو ٹیکس نیٹ میں لایا جا سکے۔ ذرائع کا کہنا ہے کہ اس اقدام کے نتیجے میں نہ صرف ملک بلکہ عوام کو بھی فائدہ ہوگا، سونے کی قیمتوں میں کمی آنا بھی شروع ہو گئی ہے۔ یہ بتانا ضرویر ہے کہ گزشتہ دو ہفتوں کے دوران سونے کی قیمتوں میں کمی آئی ہے اور فی تولہ قیمت 2؍ لاکھ 36؍ ہزار روپے فی تولہ سے کم ہو کر 2؍ لاکھ 14؍ ہزار روپے فی تولہ ہوگئی ہے۔