طالبان کیلئے تعریفی تبصرے پر برطانوی رکن پارلیمنٹ عہدے سے مستعفی

کراچی(نیوز ڈیسک)برطانوی رکن پارلیمنٹ ٹوبیاس ایل ووڈ کامنز کمیٹی کے سربراہ کے عہدے سے مستعفی ہوگئے، انہیں طالبان کے لیے تعریفی تبصروں کے بعد شدید ردّعمل کا سامنا تھا غیرملکی میڈیا رپورٹس کے مطابق جولائی میں قدامت پسند سیاستدان ٹوبیاس ایل ووڈ نے سوشل میڈیا پر ایک ویڈیو پوسٹ کی، جس میں انہوں نے اگست 2021 میں طالبان کے قبضے کے بعد افغانستان کو ایک تبدیل شدہ ملک قرار دیا تھا۔انہوں نے دورہ افغانستان کے بعد کہا تھا کہ امن و امان کی صورتحال بہت بہتر ہوئی ہے، بدعنوانی اور افیون کی تجارت میں کمی آئی ہے۔سابق برطانوی وزیر دفاع نے خواتین کے حقوق کے حوالے سے زیادہ بات نہیں کی، جو طالبان کے دورِ حکومت میں نہ ہونے کے برابر ہیں۔ٹوبیاس ایل ووڈ کے تبصرے کی افغان خواتین، سابق فوجیوں اور کچھ کنزرویٹو ساتھیوں سمیت کراس پارٹی ڈیفنس سلیکٹ کے کئی ارکان نے مذمت کی تھی۔