شہری کو 12 لاکھ روپے بجلی کا بل بھیجنے پر نیپرا، کے الیکٹرک کو نوٹس

کراچی(این این آئی)سندھ ہائیکورٹ نے شہری کو بجلی کا بل 12 لاکھ روپے بھیجنے پر کے الیکٹرک اور نیپرا حکام کو نوٹس جاری کرتے ہوئے فریقین سے 20ستمبر تک تحریری جواب طلب کرلیاہے۔جمعرات کوسندھ ہائیکورٹ میں شہری کی جانب سے بجلی کا زائد بل بھیجنے کے خلاف درخواست پر سماعت ہوئی۔ناظم آباد کے شہری نے عدالت میں موقف پیش کیا کہ کے الیکٹرک کی جانب سے ناجائز بل بھیجا گیا، ہائیڈرنٹ چلانے کے جھوٹے الزام میں 12لاکھ کا بل بھیجا گیا۔عدالت نے درخواست گزار سے استفسار کیا کہ توکیا آپ ہائیڈرنٹس چلاتے ہیں؟۔ جس پر درخواست گزار نے کہا کہ نہیں جج صاحب میں ایک رہائشی گھر میں رہتا ہوں۔عدالت نے کہا کہ گھر کی تصاویر ہیں تو دکھائیں۔ جس پر درخواست گزار نے کہا کہ گھر کی تصاویر اس وقت موجود نہیں ہیں، بل ادا نہ کرنے کی صورت میں بجلی بھی منقطع کردی گئی ہے۔عدالت نے استفسار کیا کہ آپ نے کے الیکٹرک کے آفس سے رجوع کیا۔ جس پر شہری نے بتایا کہ میں کے الیکٹرک کے دفتر گیا، تو انہوں نے بل 12لاکھ سے 8 لاکھ کردیا۔عدالت نے استفسار کیا کہ آپ ابھی کیا چاہتے ہیں۔ جس پر شہری نے کہا کہ میں چاہتا ہوں کیس میں اسٹے آرڈر دیا جائے۔