مقبوضہ کشمیر جلد بھارتی تسلط سے آزاد ہوکر پاکستان میں شامل ہوگا ، لطیف اکبر

راولپنڈی (این این آئی)آزاد جموں و کشمیر قانون ساز اسمبلی کے سپیکر چوہدری لطیف اکبر نے کہا ہے کہ پاکستان نے ہمیشہ کشمیری عوام کے بنیادی حق خودارادیت کی حمایت کی ہے۔ کشمیریوں کی آزادی کا وقت اب زیادہ دورنہیں۔ آزادکشمیر کی مخلوط حکومت عوامی خدمت کیلئے کوشاں ہے۔ مہاجرین جموں و کشمیر مقیم پاکستان کیلئے مختص فنڈز کی منصفانہ تقسیم یقینی بنائیں گے۔ وہ اپنے اعزاز میں دیئے گئے ایک استقبالیہ سے خطاب کر رہے تھے۔ قبل ازیں استقبالیہ تقریب پہنچنے پر سپیکر آزاد جموں و کشمیر قانون ساز اسمبلی کا پرتپاک اسقبال کیا گیا۔ استقبالیہ تقریب سے اشفاق بخاری، سابق ناظم چوہدری آصف ایڈووکیٹ، معاون خصوصی برائے سپیکر عزادار حسین کاظمی، اشتیاق بخاری، ملک ابرارحسین، سردار سعید اختر اور دیگر مقررین نے بھی خطاب کیا۔ اس موقع پر خطاب کرتے ہوئے آزاد جموں و کشمیر قانون سازاسمبلی کے سپیکر چوہدری لطیف اکبر نے کہا کہ پاکستان نے ہر پلیٹ فارم پر مسئلہ کشمیر کے منصفانہ حل اور اقوام متحدہ کی قراردادوں پر عمل درآمدکا اصولی مطالبہ کیا ہے۔ انہوں نے کہا کہ ریاست پاکستان بالخصوص پاکستانی عوام نے ہمیشہ کشمیریوں کے حق خودارادیت کی حمایت کی ہے۔ وہ وقت دورنہیں، جب مقبوضہ کشمیر پر بھارتی تسلط کا خاتمہ ہو گا اور کشمیر آزاد ہو کر پاکستان کے ساتھ شامل ہو گا۔ چوہدری لطیف اکبر نے مزید کہا کہ آزاد کشمیر کی حکومت تمام تر مشکلات اور چیلنجز کے باوجود عوامی مسائل کے حل اور خطہ کی تعمیروترقی کیلئے سرگرم عمل ہے۔ آزادکشمیر میں بیروزگاری کے خاتمے اور مہنگائی پر کنٹرول کیلئے بھی جامع پالیسی مرتب کی جا رہی ہے۔ سپیکر آزاد کشمیر قانون ساز اسمبلی نے کہاکہ مہاجرین جموں و کشمیر کیلئے مختص فنڈز کی منصفانہ تقسیم کو یقینی بنانے کیلئے مربوط پالیسی پر عمل پیرا ہے۔