قوم آج چیئرمین PTI کے کئے گئے اقدامات کی سزا بھگت رہی ہے، فضل الرحمٰن

پشاور(نمائندہ جنگ) جمعیت علمائے اسلام کے قائد مولانا فضل الرحمن نے کہا ہے کہ قوم آج چیئرمین پی ٹی آئی عمران خان کی حکومت کی پالیسیوں اور کئے گئے اقدامات کی سزا بھگت رہی ہے ،عمران خان نے ملک کو کنگال کر کے بین الاقوامی ایجنڈے کے تحت پاکستان کو معاشی اور اقتصادی بدحالی کی طرف دھکیلا، پاکستان اور افغانستان مشترکہ کمیشن تشکیل دیکر مسائل کے حل کی طرف بڑھ سکتے ہیں، جے یو آئی اس میں بنیادی کردار ادا کرنے کیلئے تیار ہے، ان خیالات کا اظہار انہوں نے پشاور میں جے یو آئی خیبرپختونخوا کی مجلس شوریٰ کے اجلاس سے خطاب کرتے ہوئے کیا ، مولانا فضل الرحمن نے کہا کہ عمران خان نےملک کو کنگال کر کے بین الاقوامی ایجنڈے کے تحت ملک کو معاشی اور اقتصادی بدحالی کی طرف دھکیل دیا ہے ،انہوں نے کہا کہ قوم آج سابقہ حکومت کی غلط پالیسیوں کی سزا بھگت رہی ہے،ملک میں امن و امان کی صورتحال باجوڑ سانحہ، مولانا حمد اللہ اور جمعیت کے دیگر رہنماؤں پر حملے سوالیہ نشان ہیں۔