سوڈان،پیر املٹری فورسز کا فوجی ہیڈ کوارٹرز پر حملہ،شدید جھڑپیں

ود مدنی، سوڈان (اے ایف پی، جنگ نیوز) سوڈان کے دارالحکومت خرطوم میں پیرا ملٹری فورسز نے مسلسل دوسرے روز فوج کے ہیڈ کوارٹرز پر حملہ کردیا، عینی شاہدین کے مطابق سوڈانی دارالحکومت میں جگہ جگہ آگ کے شعلے بھڑک رہے ہیں، متحارب فورسز کے درمیان جاری لڑائی چھٹے ماہ میں داخل ہوگئی ہے۔ خرطوم سے عینی شاہدین نے بتایا کہ اب فوج کے ہیڈ کوارٹر کے ارد گرد مختلف قسم کے ہتھیاروں کے ساتھ جھڑپیں ہو رہی ہیں۔ گزشتہ روز فوج اور پیراملٹری ریپڈ سپورٹ فورسز کے درمیان لڑائیوں میں شدت آگئی تھی جس کے نتیجے میں وسطی خرطوم میں کئی اہم عمارتوں کو آگ لگ گئی۔ تصدیق شدہ سوشل میڈیا پوسٹس پر صارفین نے خرطوم کے مشہور اسکائی لائن ٹاور کو تہہ و بالا کرنے والی آگ کی فوٹیج شیئر کیں، جس میں گریٹر نیل پیٹرولیم آئل کمپنی ٹاور بھی شامل ہے۔ صارفین نے خرطوم میں تباہی پر افسوس کا اظہار کیا جہاں عمارتوں کی کھڑکیوں کے شیشے ٹوٹے گئے اور ان کی دیواریں متاثر ہوئیں۔ آرمی چیف عبدالفتاح البرہان اور ان کے سابق نائب آر ایس ای کمانڈر محمد حمدان ڈگلو کے درمیان 15 اپریل کو شروع ہونے والے تصادم میں ایک اندازے کے مطابق تقریباً 7 ہزار 500 افراد ہلاک ہو چکے ہیں۔