آذربائیجان کا ناگورنو کاراباخ کے خلاف فوجی آپریشن شروع

باکو (اے ایف پی)آذربائیجان نے گزشتہ روز ناگورنو کاراباخ کے خلاف فوجی آپریشن شروع کردیا اور امن کی پیشگی شرط کے طور پر متنازع پہاڑی علاقے سے آرمینیائی افواج کے مکمل انخلاء کا مطالبہ کیاہے۔حالیہ عرصے میں ایک نئی جنگ کے خدشات بڑھتے جا رہے ہیں، آرمینیا نے آذر بائیجان پر فوج کی تعیناتی کا الزام لگایا ہے اور ناگورنو کاراباخ سے اس کے واحد زمینی رابطے کی ناکہ بندی کو مسترد کر دیا ہے۔آذربائیجان کی وزارت دفاع نے کہا کہ وہ فرنٹ لائن اور گہرائی میں اعلیٰ درستگی والے ہتھیار استعمال کر رہی ہے۔ وزارت دفاع نے ایک بیان میں کہا کہ علاقے میں مقامی سطح پر انسداد دہشت گردی کے اقدامات شروع کیے گئے ہیں۔وزارت نے کہا کہ اس نے شہریوں کےانخلا کے لیے انسانی ہمدردی کی راہداری اور استقبالیہ مقامات کھول دیے ہیں۔ایک اہلکار نے بتایا کہ آذربائیجان نےانسداد دہشت گردی آپریشنز شروع کرنے کے بعد سوشل میڈیا کی بڑی کمپنی ٹک ٹاک تک رسائی کو عارضی طور پر بند کر دیا۔ آذر بائیجان کی ڈیجیٹل ترقی اور ٹرانسپورٹ کی وزارت کے ایک اہلکار نے مزید تبصرہ کرنے سے انکار کرتے ہوئے کہاکہ آذربائیجان میں ٹک ٹاک تک رسائی 19 ستمبر سے عارضی طور پر بند کر دی گئی ہے۔ آذربائیجانی افواج پر کاراباخ میں پیش قدمی کی کوشش کرنے کا الزام لگاتے ہوئےآرمینیائی علیحدگی پسندوں نے کہا کہ لڑائی میں دو شہری ہلاک اور 23زخمی ہوئے۔سابق سوویت قفقاز کے حریف کاراباخ پر کئی دہائیوں سے تنازع جاری ہے اور 1990کی دہائی اور 2020 میں بڑے پیمانے پر جنگیں ہوئیں۔